Union minister of state for home affairs aizawl-ah lo zin
Vawiin khan Union Minister of State for Home Affairs Pu Bandi Sanjay Kumar chuan ni hnih cham turin Aizawl a lo thleng a, Lengpui Airportah Dr. Andrew H. Vanlaldika, Addl. Secretary, Home Department leh Pi C. Lalremruati, Protocol Officer ten an lo hmuak a ni.
Pu Bandi Sanjay Kumar hian 23 Sector Headquarters, Assam Rfles, Khatlaah chhunchaw a ei a, hemi zawh hian MINECO Conference Hall-ah Mizoram sawrkar deparrtment hrang hrang hotute nen an inkawm a ni. He hunah hian Union Minister of State Pu Bandi chuan hmun hla tak atang in harsatna leh mamawhte ngaithla turin ka lo kal vang vang a, inthlahrung hauh lova Mizoram hmasawnna tur atana an vei leh ngaih pawimawhte sawi turin sawrkar official pawimawh kalkhawmte a chah a ni.
He inkawmhona hi Chief Secretary mawhphurhna chelh lailawktu Pu R. Zarzosanga’n a kaihruai a, Home Secretary Pu David Lalthantluanga leh Agriculture & Farmers’ Welfare Secretary Pi Ramdinliani ten power presentation pe in an department hnuaia Centrally Sponsored Scheme kalpui mekte sawifiahin, an hlawhtlinna bakah harsatna an tawhte leh a sutkian dan turte an sawifiah nghal bawk a, hemi hnu hian sawrkar department hrang hrang aiawh a lo kalte chu an department hnuaia hmalakna, harsatna leh mamawhte uluk takin an sawiho nghal a, Union Minister of State hian report kimchang taka siam a, a hnena thehlut turin thurawn a pe a, a tul ang anga bawhzui a nih tur thu a sawi a ni.
He inkawmhonaah hian BSF leh 23 Assam Rifles DIG te ve ve pawh telin, Mizoram depa India ramri (Myanmar leh Bangladesh) a venhimna kenkawh chungchangte, ramri hung chungchangte leh ramri depa thingtlang khuate Vibrant Villages Programme kaltlanga tihchangtlun dan turte report an pe a ni. Mizoram sawrkar officials te pawhin thil pawimawh chi hrang hrang – khualzin hip tam lehzual tura hmalak dan turte, India ram pawn atanga khualzin lo lut te’n Restricted Area Permit/Protected Area Permit chungchanga harsatna an tawh sutkian sak a tul thute, sector hrang hranga Mizoram dinhmun leh Vikshit Bharat (developed India) 2047 dungthula Mizoram tihhmasawnna tur “Transformed Mizoram Vision 2047” atana ruahmanna leh tihhlawhtlin turte sawiho a ni bawk.
Sawrkar mipawimawhte nen an inkawm zawh hnu hian Union Home Minister of State hian Mizoram Police Headquarters, Khatla tlawhin GS Arya Mess-ah Mizoram Home Minister Pu K. Sapdanga’n lo mikhualin thingpui a inpui a ni.
Ruahman dan chuan Pu Bandi hian naktukah video conferencing (VC) hmangin Siaha district-a sawrkar hotu pawimawhte a kawm ang a, VC hmang vek hian khawtlang aiawhte leh NGO aiawhte a kawm bawk ang.
Vawiina Mizoram sawrkar hotute nen an inkawmnaah hian Union Home Minister hi a Private Secretary Andra Vamsi, IAS, Personal Assistant Parimala Srinivas leh Public relations Officer Pasunuru Madhu ten an tawiawm a, Mizoram sawrkar officialte hi Chief Secretary mawhphurhna chelh lailawktu Pu R. Zarzosanga’n hovin Mizoram DGP bakah sawrkar department hrang hrang Home, Planning, School Education, Agricultuture & Farmers’ Welfare, Horticulture, Commerce & Industries, Excise & Narcotics, Finance, Transport changtu Secretary te, IG of Prisons bakah Health & Family Welfare, PWD, Tourism, Forensic Science Laboratory hotute an tel a ni.
