Zikhlum Kut (Cabbage Festival) chu Siaha District a Siata khua-ah hman a ni
Siaha District Horticulture Office (DHO) leh Sanghe Multipurpose Primary Agricultural Credit Societies (MPACS) tangkawp buatsaihin vawiin khan Pu T Samuela Farm-ah Zikhlum Kut (Cabbage Festival) hman a ni a, District Bawrhsap Pi Saizikpuii chuan khuallian niin he hun hi a hmanpui.
Khuallian Pi Saizikpuii chuan Siata khaw mipui ten an lo dawnsawn dan chu lawmawm a tih thu leh Zikhlum kut a khuallian tura an sawm chu zahawm a tih thu a sawi. Siata khaw chhehvela zikhlum hmunte chuan nun a ti hahdamin a hmuhnawm tham hle tiin khaw mipui thawhrimna a lang chiang a, malsawmna tam tak an dawng chu a lawmpui hle tiin an inlungrualna chu chhuanawm a tih thu a sawi bawk.
DC chuan changkanna chu tehfung hrang hranga teh thin a nih thu leh kuthnathawk tuten an hah man phu tawk an lakluh loh chuan kawng dangah hma sawn mahse a tluantling lo thin a ti a, kut hnathawktuten an hah man an hmuh theih nana hmalakna hrang hrang chu chhuanawm a tih thu leh Siata khuaa ‘Cabbage Festival’ chu rampum a thangchhuak khawpa hlawhtling turin duhsakna hlanin tang sauh sauh turin a chah nghal bawk.
Vawiina hun hmannah hian MADC an Executive Member Pu M Chiadung chuan Best Farmer Award Pu T. Samuela hnenah a hlan a. Hei bakah hian zai leh lamin hun hlimawm tak hman a ni bawk.
Siaha District a awm Siata khua-ah hian Zikhlum chin runpui hi kumin atang khan Mizoram Sawrkar hnuaia Horticulture Department leh Sanghe MPACS tangho a kalpui niin tun dinhmunah chhungkaw 73 ten zikhlum an ching mek a ni.
