Minister Dr Vanlalthlana’n Assam Royal Global University Convocation vawi 6-na hmanpui; Mizoram chu Convocation theme-ah hman a ni
Vawiin khan Assam Royal Global University (RGU), Guwahati chuan an inkhawmpui lian, Sixth Convocation chu an hmang a. He hunah hian Mizoram Higher & Technical Education Minister Dr Vanlalthlana chu Khual Zahawm niin a tel.
Kumin RGU Convocation-ah hian India hmar-chhak bial aṭangin Mizoram chu theme atan hman a ni a. Minister Dr Vanlalthlana chuan thu sawiin, convocation theme atana Mizoram an thlang chu lawmawm a ti a, hei hian Assam leh Mizoram inkara inlaichinna ṭha tak awm chu a tar lang a ni, a ti.
Dr Vanlalthlana chuan RGU-a Mizo zirlai awmte chu theih tawp chhuah a, mahni ngaihtuahna hmang thiam tur leh rinawmna vawng nung tura chahin, an hlawhtlinnate chu Mizoram tana hmang chhuak turin a fuih.
Higher & Technical Education Minister chuan India hmar-chhak state-te chu India ram ‘Act East Policy’ hnuaiah Asia chhim-chhak ramte nena inzawmna kawngkhar pawimawh tak an ni a ti a. Hmunhma neih ṭhat ringawt aiin, mihringte chu ram hausakna pawimawh ber an nih thu leh, khawvel hmasawnna kal zelah AI leh khawlten hna an thawh theih hunah pawh thiamna thar nei tura inzir zel turin zirlaite chu a chah a, chu chu University-te mawhphurhna a nih thu a sawi bawk.
Minister Dr Vanlalthlana chuan RGU hmasawnna tar langin, University hmalaknate ropui a tih thu a sawi a. Degree dawng thar zirlaite chu hlawhchham hlau lova huaisen taka hma la tur leh, hlawhtlinna chu sum leh nihna piah lamah nungchang mawi leh mi dangte tana malsawmna nihnaa teh zawk ṭhin turin a chah.
He Convocation hi Assam Governor leh RGU Visitor ni bawk, Sri Lakshman Prasad Acharya chuan a kaihruai a. Convocation Address hi Padma Bhushan dawngtu leh ThePrint dintu Shekhar Gupta chuan a sawi a. Dr Ranoj Pegu, Assam Education Minister pawh Guest of Honour niin a tel bawk. He hunah hian mi panga hnenah Honoris Causa degree hlan an ni.
Minister Dr Vanlalthlana hi Dr R. Lalhmingthanga, Joint Director, Higher & Technical Education chuan ṭawiawm a ni.
