ED chuan ruihhlo hmanga sumdawnna chhuina kal zelah cheng vbch 26 leh nuai 1 hu an hreng
Enforcement Directorate, Aizawl leh Imphal Sub-Zonal Office hnathawkte chuan Mizoram leh Manipur-ah bungrua cheng vaibelchhe 26 leh nuai 1 hu an hreng.
Nimina ED-in thuchhuah an siamah chuan he mi chungchangah hian mi 6 man an ni a, bank account 1,424 an hreng a, sum chhehrelh atanga lei ni a rinhlelh cheng vaibelchhe 26 chuang khawih chet theih lohvin an hreng a ni. Enforcement Directorate, Aizawl leh Imphal Sub-Zonal Office a thawkte chuan Zirtawpni khan Prevention of Money Laundering Act, 2002 section 17-na tlawhchhanin Aizawl, Champhai leh Lawngtlai bakah Manipur a Churachandpur-ah hmun tam tak an dap a. An hmun dapte hi Myanmar atanga heroin, methamphetamine leh brown sugar tawlh rukna nena inzawm an nih thu an thuchhuah chuan a sawi a. Hmun hrang hrang an dapna-ah hian Narcotics Control Bureau leh Mizoram Police te’n an tawiawm a. Mizoram bika ruihhlo hmanga sumdawnna behchhana bungrua an lei khawih chet theih lohva an hren hi cheng vaibelchhe 17 leh nuai 82 a ni.
PMLA, 2002 section tlawhchhanin Mizoramah mi 3 leh Manipur-ah mi 3 an man a. He thubuai lo intanna hi nikum lama Zokhawthar Police Station a ruihhlo chungchang thubuai ziah luh, Champhai district Police te’n heroin kg 4 leh gram 722 an man atanga lo intan a ni ber a. Myanmar atanga ruihhlo tawlhruk, Zokhawthar atanga Aizawl a phurh tur man a ni a. Hei bakah hian Seling bula NCB mite’n Agartala a phurh thlak tur methamphetamine kg 49 leh gram 101 an man atangin a lo intan bawk a ni. Ruihhlo hmanga sumdawnna atana hman pawisa chheprelh chungchangah hian a bulpui ber pakhat chu Champhai a JTS Store neitute nupa an ni a. India pawisa leh Myanmar pawisa (Kyat) thleng lampang buaipuitu an ni.
Ruihhlo hmanga sumdawnna hi Myanmar atanga intan, Myanmar leh India hmarchhak inrina kilometre 1,643 kaltlanga kalpui a ni a. India ram state hrang hrangah ruihhlo hi tawlh luh a ni a. He dan kalha sumdawnna a hlawkna an hmuhte chu dan anga sumdawnna sum thianghlim anga lantir tumin an chheprelh ta thin niin ED hotute chuan an sawi a ni. ED hotute’n an hmuhchhuah chinah he sum chheprelh hi cheng vaibelchhe tam tak leh bungraw tam tak a ni a. Bank account sang chuang hmangin Aizawl, Lawngtlai, Champhai leh Churachandpur a Mini-ATM kaltlanga sum hi lakchhuah a chheprelh thin a ni tih an hmuchhuak a ni.
