World veterinary day 2026 lawm
Animal Husbandry & Veterinary (A.H&Vety.) Department, Mizoram State Veterinary Council (MSVC) leh Indian Veterinary Association (IVA) Mizoramte tangkawp buatsaihin vawiin khan Mc Cabe Hall, Aijal Club-ah “Veterinarians: Guardians of Food and Health” tih thupui hmangin ‘World Veterinary Day (WVD) 2026’ lawm a ni. He hunah hian Pu Lalsangliana, Secretary, A.H & Vety. Department chu Khuallian niin, Dr. Lalremliana, President, MSVC chu Khualzahawm a ni.
Khuallian A.H & Vety. Secretary Pu Lalsangliana chuan IVA member zawng zawngte World Veterinary Day pual chibai bukin duhsakna a hlan a. Ei leh bar dehchhuah bakah a hrisel em tih ngaihven thlengin Veterinarian-te an pawimawh thu sawiin, ran hriselna mai piah lamah ram leh hnam hriselna chu an kutah thui tak a innghah thu a sawi a. Veterinary profession chu hna zahawm tak anih thu sawiin, eizawn nana thlang tawhte chu hawi kir lova, tih takzeta thawka an thiamna leh tawnhriatte hmanga danglamna thlentu nih tum turin a chah a ni.
AH& Vety. Secretary chuan Animal Husbandry & Dairying chu Sawrkar laipuiin a ngaih pawimawh thu leh a la tih len deuh deuh dawn thu a sawi a. Department hnuaia thawktute inpekna fakawm a tih thu sawiin, Sawrkar laipui atanga fakna awka dawn a ni chu lawmawm a tih thu a sawi a. Ran hmangaihtu mimal leh pawl chawimawi takte chhuanawm a tih thu sawiin, theihtawp chhuah chhunzawm zel turin a chah a. Department nena thawhhona tha chhawmnun zel a pawimawh thu a sawi bawk.
World Veterinary Day 2026 lawmna hun hi Dr. Robert Rualthankhuma, President, IVA Mizoram chuan kaihruaiin Dr. C. Lalchhandama, General Secretary, IVA-in report a pe a. Khualzahawm Dr. Lalremliana, President, MSVC leh Dr. Lalrotluanga Sailo, Director, AH&Vety. Department-te hnen atangin thusawi ngaihthlak a ni a. Ran ngaihsaka an hamthatna tura thawk tha mimal leh pawl hrang hrang 10 te hnenah chawimawina thuziak cheimawi hlan a ni a. Member thite sunna hun hman niin, kum 2026-2028 chhung atana IVA Mizoram hruaitu tur thlan a ni bawk a. Dr. Suzanne Malsawmthangi, Treasurer, IVA-in lawmthu sawiin hun hman a khar a ni.
Hemi hma hian Dr. V. Lalzarzova, Vice President, IVA kaihhruaiin Ran Doctor-te tana intuaitharna hun hman a ni a. Dr. Lallawmzuali Ralte, Associate Professor, College of Veterinary Sciences & Animal Husbandry (CVSc&AH), Selesihin “Veterinary Council of India – Standard of Professional Conduct, Etiquette & Code of Ethics for Veterinary Practitioners Regulations, 1992” tih thupui hmangin zirtirna a pe a. Dr. Joy Lalmuanpuia, Assistant Professor, CVSc&AH, Selesihin kumin thupui “Veterinarians : Gaurdians of Food and Health” tih hmangin zirtirna a pe bawk.
