Bunghmun BDO Pu Paul Rokima’n MHIP Laisawral Branch Golden Jubilee lawmna hun a hmanpui

Vawiin khan Mizo Hmeichhe Insuihkhawm Pawl (MHIP) Laisawral Branch chuan an din champha phak vawi 50-na (Golden Jubilee) chu Venglai kawtchhuahah an lawm a. Bunghmun Block Development Officer (BDO) Pu Paul Rokima chuan Khuallian niin hun a hmanpui.

Khuallian Pu Paul Rokima chuan Jubilee lungphun a hawn hnuah thu sawiin, MHIP Laisawral Branch hruaitu hmasate leh hruaitu ni mekte zahna chibai a buk a. Hmeichhiate chu ram rorelna sang berah leh sawrkar hna hrang hranga roreltu dinhmuna ding thei an nih thu sawiin, kawng hrang hrangah mipa zawkte tluk loh an nih thu a sawi a. “Hmeichhe finin tuikhur ral a kai lo,” tih chu a dik lohzia Mizo hmeichhiate’n an tichiang zel a, zirna pangngai leh competitive exam bakah, eizawnna leh sumdawnna thlengin mipa tam tak tluk loh hmeichhia an awm ta fur mai tiin, “Mipa hlawhtling tak phenah hmeichhia an awm ṭhin,” tih thufing aṭang ringawt pawhin hmeichhiate thiltihtheihzia leh ropuizia a hriat, a ti.

Bunghmun BDO Pu Paul Rokima chuan Mizo hmeichhiate chu India ram mai ni lo, khawvel dâp chhuaka hna thawka awm an tam avangin Mizo hmel lanna pakhat an ni tih hre turin a chah a. Khawvelin Mizo ram leh hnam a hmuh dan turah hmeichhiate kutah mawhphurhna sang tak a awm tih sawiin, sawi sep kai zawnga awm lo turin a chah a. MHIP chu pawl ṭangkai leh hlu tak a nih angin Mizo hmeichhiate hamṭhatna, din khaw chhuahna tur leh nunphung ṭha inkawhhmuhna kawngah te theih tawp chhuaha ke pen zel tur leh Mizote chim ral kan nih loh nan fa hrin kawnga ṭan la turin a chah.

MHIP Laisawral Branch Golden Jubilee lawmna hi hun hnihah ṭhen niin, hun hmasa zawkah Jubilee dar vuak leh lungphun hawnna hun buatsaih a ni a. Hun hnuhnung zawkah Branch President Pi Lianthangpuii kaihhruaiin “Nute mawhphurhna” tih thupui hmangin hruaitute hnen aṭangin thu sawi hrang hrang ngaihthlak a ni a. Special item hrang hrang thlir ho leh ngaihthlak ho niin, Khuallianin Souvenir a tlangzarh bawk.