Gauhati High Court Judge Hon’ble Mr Justice Nelson Sailo hovin Lungleiah pawi khawihna tuartute hnenah zangnadawmna sem a ni

Vawiin khan Mizoram State Legal Services Authority (MSLSA) leh Lunglei District Legal Services Authority (DLSA) ṭang kawp huaihawtin Lunglei Ramthara Hotel Silver Mount Conference Hall-ah pawi khawihna tuartute hnena zangnadawmna pekna dan, “The Mizoram Victims of Crime Compensation Scheme, 2011” zir hona leh he dan hnuaia zangnadawmna semna hun buatsaih a ni a. Gauhati High Court Judge & MSLSA Executive Chairman, Hon’ble Mr Justice Nelson Sailo chuan Khuallian niin a hmanpui.

Khuallian Hon’ble Mr Justice Nelson Sailo chuan pawi khawihna tuartute a tuarpui tak zet tih sawiin, an hmabak leh inenkawl zui zelna turah duhsakna a hlan a. Zangnadawmna chu taksa, rilru leh sum leh paia an tuarna chhawk vek theihna leh an mamawh zawng zawng phuhrukna tur ni lo mah se, sawrkarin an vanduaina tawh chu a hriatpuiin,a tuarpui tih lantirna leh a tuartute’n nunphung pangngai tak an neih theih nana inenkawlna tura zangnadawmna a nih thu a sawi a. Mizoram sawrkarin pawi khawihna tuartute tana scheme ṭha tak a ruahman chu lawmawm a tih thu sawiin, scheme kal tlangin zangnadawmna sum ṭhahnem tak sem a nih tawh thu a sawi a. Scheme ṭha tak chu pawi khawihna tuartu leh mipuite’n an hriat zau va, dil nachang an hriat a, zangnadawmna dawng thei zawng zawngte’n an dawn vek theih nan kal khawmte chu a puanzar leh tihlar kawngah theih tawp chhuahpui turin a ngen a. Zangnadawmna dawng tura thlan tawh zingah pek dawna anmahni zawn chhuah theih lohte an awm ṭhin thu sawiin, an chin hriat a nih theih nan awmna hmun insawnte pawhin thuneitute hriattir a, inbiak pawhna ṭha a awm a ṭul thu a sawi a. Lunglei District-a scheme ken kawhna kawngah District & Sessions Judge leh a thawhpuite, DLSA te, Deputy Commissioner, Superintendent of Police, Bar Association, Legal Aid Counsel, Prosecutor leh tlawmngai pawlte thawh hona ṭha tak chu lawmawm a tih thu sawiin, ṭhahnem ngai taka thawk ho zel turin a chah.

Hon’ble Mr Justice Nelson Sailo chuan India ramah dan hmanga rorelna chu mipui rorelna (democracy) banpui pawimawh pathum zinga pakhat a nih thu leh khua leh tui zawng zawng chu dan hnuaia awm an nih thu sawiin, khua leh tuite’n an dikna leh chanvo ṭha taka an chan theih nan te, thubuai neite chung thu rang taka rel fel a nih a, sum leh pai, hun leh tha te ṭul lova sen ral a nih loh nan te, mipui rorelna banpuite inbuk tawk taka a kal theih nan te dan rorelna (judiciary) hmun hma leh hmanraw ṭha leh changtlung tak neih a ṭul thu a sawi a. Lunglei chu Mizoram khawpui lian ber dawttu a nih angin hmasawnna kawng tinrengah hmahruaitu a nih a ṭul thu leh Lunglei District leh a chhehvel mipuite tan dan a lal zel theih nan District Court hmunpui ṭha leh changtlung tak neih thuai a ṭul thu sawiin, hmun hma ṭha leh mamawh hrang hrangte mipuiin veipui a, a theihna apianga thawhpui leh ṭawiawm zel turin a ngen a. Mipuiin dan an hriat a, an harsatnaah puihna an dawn thuai theih nan MSLSA leh DLSA kal tlangin National Legal Services Authority (NALSA) hnuaia mipui hamṭhatna leh scheme hrang hrang inzirtirna hmun hrang hrangah ṭhahnem ngai taka kalpui reng a nih thu sawiin, a mamawhtute chuan inthlahrung lova MSLSA leh DLSA te pan ṭhin turin a chah.

Lunglei District Bawrhsap Pi Navneet Mann chuan pawi khawihna a thlenin a tisualtu man chhuah leh an chung thu relna kawngah chak taka hma lak ṭhin a nih laiin, a tuartute tuarna hmuh hmaih a ni fo tih a sawi a. Pawi khawihna tuartute leh an chhungte tana chhawmdawlna leh enkawl zuina ṭha tak ruahman chu thil pawimawh tak a nih thu sawiin, Mizoram sawrkarin chumi kawnga zangnadawmna scheme ṭha tak mai a ruahman chu lawmawm leh hlu a tih thu a sawi a. DLSA leh Victim Compensation Committee te’n theih tawp an chhuahna azarah leh MSLSA leh sawrkar thuneitute ruahmanpuina azarah zangnadawmna diltu leh dawng turte’n a hun takah an dawng thei ṭhin chu lawmawm a tih thu sawiin, Lunglei District mipuite tan judiciary leh district administration-in thawh hona ṭha tak a neih chu chhawm nun zel a nih a beisei thu a sawi.