Srinagar-a Sports Minister Conference-ah Pu Lalnghinglova Hmar tel
India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu nimin leh vawiin khan Srinagar-a Sher-i-Kashmir International Conference Centre (SKICC) ah neih a ni. He hunah hian Mizoram Sports & Youth Services Minister Pu Lalnghinglova Hmar chu telin session pakhat a kaihruai.
Ministry of Youth Affairs and Sports (YAS) buatsaih Sports Minister Conference hi Union Youth Affairs & Sports Minister Dr. Mansukh Mandaviya leh Minister of State Pi Raksha Nikhil Khadse te’n a bul aṭanga a tawp thlengin an uap a. Session pasarih awmin, Mizoram Sports Minister Pu Lalnghinglova Hmar chuan, “Khelo Bharat Niti: Strengthening Centre State Coordination” tih session a kaihruai a ni.
India in Olympic Games 2036 thlen tumin hma a la mek a, Olympic lam hawiin India sports kalphung a inher mek. Sports Minister ‘Chintan Shivir’ pawh hi Olympic Games 2036 a medal tam zawk la thei tura inbuatsaihna lam hawia kalpui a ni.
Mizoram Sports Minister Pu Lalnghinglova Hmar chuan Indian sports kalphung inthlak mek chu lawmawm a tih thu sawiin, “Olympic 2036 thlir chunga hmalakna chuan sports discipline zawng zawng a huam thei dawn lo a, Olympic medal beiseiawmna discipline te thlur binga duat bik an ngai. Kan kal dan ngai renga kan kal chuan kan result pawh a ngai reng dawn a, hmasawn tur chuan thlak ngai a awm thin,” tiin India-in sports a kalpui dan a thlak a ṭul thu a sawi a; Sports Authority of India siam țhat ṭul a tih thu a sawi chhuah bakah Delhi aṭanga thutlukna siam mai loin state hrang hranga sports official leh association te zin chilh thin turin sawrkar laipuia sports hotute a sawm bawk.
Pu Tetea Hmar chuan infiammite hmasawnna’n coaching lama hnasawn hmasak a pawimawh tih a sawi a; Olympic Games 2036 hmathlir nei chungin kum 2024 ah Mizoram Sports Conclave buatsaih a nih thu leh, Bana Kaih ‘Empowering Mizoram Sports’ hnuaiah naupang kum 8 – 15 inkar tan state pum huapa coaching kalpui mek a nih thu a tarlang. School Education Department nen tangkawpin ‘Grassroot Sports Development Programme’ hnuaiah school naupangte sports coaching pek an nih thu sawiin, age group inelnaa kum dik lo awm thin tibo tura Mizoram hmalakna a tarlang bawk a ni.
