Khawzawl Police-Te Tan Training Buatsaih A Ni
Vawiin khan Khawzawl District SP Pu F. Lalbiakzauva chuan SDPO Khawzawl leh Khawzawl Police Station Staff-te tana buatsaih ni 2 awh tur Police Portals leh Police Station work management chungchang inzirtirna ‘In-Service Training’ chu Khawzawl Police Station-ah a hawng.
In-Service Training hawnnaah hian SP Pu F. Lalbiakzauva chuan thu sawiin khawvel changkang chho zelah police-te hnathawhna kawng hrang hrangah tunlai thiamna thar ber ber hmangin, Portal chi hrang hrang an nei tawh a, heng police portal-te hi a nihna tur ang tak leh tangkai zawka hman a nih theihna turin police-te pawh anmahni an in tuaithar reng a tul tih a sawi a. Thubuai kaihhnawiha Court-in Witness thlenga a kohnate pawh Portal kaltlangin Online in kalpui vek a ni tawh dawn a, chuvangin police-te pawhin digital portal hrang hrangte kalphung an hriatchian a ngai a ni a ti.
Training-ah hian Khawzawl SDPO Pu Jeremia Vanlalhmachhuana, OC, Inspector Pi T. Lalnuntluangi leh Sherista S.I C. Pu Biakthianghlima ten training an pe a, mi 20 vel an tel a ni.
