UD&PA Minister Pu K. Sapdanga hovin UD&PA Department official te leh AMC Corporators ten thawhhona zanriah an eiho
UD&PA Minister Pu K. Sapdanga hoin zanin khan UD&PA Department official te leh AMC Corporators thlan tharte chuan Aizawl Sumtualah zanriah an ei hova, Aizawl khawpui enkawlna kawngah chak taka thawhho tlan zel an tum.
Zanriah eiho pah hian PowerPoint presentation hmangin khawpui enkawlna atana Swachh Bharat Mission 2.0 tangkai zawka hman dan tur leh AMC lam atanga Solid Waste Management Rules thar tha taka zawm a nih theih nana hma an lak tawh dan leh hma lak zel dan tur sawiho a ni a, inkawmhona hun hlawk thlak takin an hmang ho a ni. Bawhhlawh reng reng chi li-ah thliar hran a ngaih tawh dawn avangin tha taka mipuite zitirna kalpui chhunzawm zel ni se an ti bawk.
Pu K. Sapdanga, Minister, UD&PA Department chuan state sorkar hmasate leh AMC a roreltu hmasaten hma an lakna zarah Aizawlah rorelna mumal a awm chho zel tih a sawi a. AMC a roreltu thar ten Aizawl chu inenkawlna felfai leh dinhmun sang zawkah an hlankai ngei a beisei thu a sawi a. AMC roreltu tharte leh Department lama hnathawktute chu tha taka thawk hova, team work tha tak kengkawh zel turin a fuih a. Taima taka thawhna chuan hmasawnna eng emaw tak, lukhawng nei a thlen ngei thin tih hre chunga tih tak zeta thawk zel turin a ngen bawk. Aizawl khawpui himna tura tuiluankawr siam mek, Storm Drain Project, chu tangkai taka kalpui a nih theih nana thawhho zel a tul thu a sawi a. AMC chu mawhphurhna lian zawk pawh pek zel an duh thu a sawi bawk a ni.
Pu H. Lalremtluanga, AMC Mayor chuan Minister hmalaknaa AMC leh UD&PA ten thawhhona awmze nei leh tha an nei thei dawn nia a lang chu lawmawm a tih thu a sawi a. UD&PA Minister chungah AMC a ngaih pawimawh tak tak avangin lawmthu a sawi bawk a ni.
Inkawmhona hunah hian Pu K. Sapdanga, UD&PA Minister; Pu H. Lalremtluanga, AMC Mayor; AMC Executive Corporator te leh Corporator te bakah UD&PA Department atangin Pu K. Lalthawmmawia, Commissioner & Secretary; Pu CC Lalchhuangkima, CEO, Aizawl Smart City Ltd.; Pi Zarzokimi, Joint Secretary, UD&PA leh Pu Jacob Lalawmpuia, Director, UD&PA Department te pawh an tel a ni.
