Social Welfare Minister Pi Lalrinpuii’n Lungleiah Children’s Conclave a hmanpui
Mizoram State Commission for Protection of Child Rights (MSCPCR) buatsaih ni hnih (October 29–30, 2026 chhung) awh napangte intawh khawmna, “Children’s Conclave” hawnna hun chu vawiin khan Lunglei Convention Centre-ah Mizoram sawrkara Social Welfare, Women & Child Development Minister Pi Lalrinpuii chuan a hmanpui.
Social Welfare Minister Pi Lalrinpuii chuan Children’s Conclave chu nikum lamah Aizawla hlawhtling taka buatsaih a nih hnuah kuminah a ṭum hnih nan Lungleia buatsaih a ni leh thei chu lawmawm a tih thu sawiin, naupangte pawhin an hlawkpui ngei a beisei thu a sawi a. MSCPCR chu India Danpui Commission for Protection of Child Rights Act, 2005-in din tura a tih angin Mizoramah kum 2018-ah din a nih thu sawiin, India sawrkarin naupangte himna tur dan a siam leh hma lakna hrang hrangte Mizoram sawrkarin a bawhzuina kawngah MSCPCR chu an pawimawh hle tih a sawi.
Minister Pi Lalrinpuii chuan naupangte chu mahni inveng him zo lo, ven him leh venpui ngai, an himna tura dinsak ngai an nih thu sawiin, sawrkarin naupangte ven him, ṭanpui leh enkawlna dan a siam hrang hrang hmangin naupang harsatna tawkte ṭanpui leh enkawl te, chhawmdawl ngai chhawmdawl leh dan kalha chete enkawl zui leh siam ṭhat hna thawh thawh ṭhin a nih thu a sawi a. Naupangte chu ram leh hnam hma hun innghahna an nih avangin, an himna leh ṭhan lenna chu puitlingte mawh a nih thu sawiin, puitling taka an lo sei len theih nan naupangte enkawlna kawngah ngaihtuahna sen ngun a pawimawh thu a sawi a. Hun awl neih tam lutukin naupangte sual lamah a hruai theih avangin in lamah an tih theih tawk hna siamsak te, mobile phone khawih leh social media hman tam chu rilru leh taksa hriselnain a tuar avangin hman dan tawk tuksak te, an hun awla rimawi, thiam thil leh infiamna chi hrang hrang zirtir te chu thil pawimawh tak a nih thu a sawi.
Pi Lalrinpuii chuan zirlai naupangte chu hun awl hman ṭhat leh naupan lai aṭanga inenkawl ṭhatin hma hun ṭha tak a keng tel tih hria a, zirna, infiamna leh ei zawnna kawnga mi fel leh hlawhtlingte ngaisang a, entawn ṭhin turin a chah a. An puitlin huna ram, khawtlang leh chhungkaw tana chhawr tlak, innghahna tlak ni turin an phak tawka tih tur intuk a, hun awl nei hman lo tura hmabak insiam ṭhin turin a chah a. Kohhran leh khawtlanga inhmang tho chungin zirlai leh hna ṭha taka a tih theih thu sawiin, zirlaite tan tum fel tak neih a pawimawh thu leh hlim leh nuam ti taka thawh theih tur zirlai leh hna thlan thiam a pawimawh thu a sawi.
