Speaker Pu Lalbiakzama’n Saitual-Ah Zirlai Titha Te Chawimawina Hun A Hmanpui
Vawiinah khan Mizoram Assembly Speaker Pu Lalbiakzama chuan Govt. Saitual College Auditorium-a Saitual District chhunga Zirlai Titha Chawimawina hun Saitual MZP Hqrs.-in buatsaih chu khuallian niin a hmanpui.
Speaker chuan thu sawiin, Mizote chu lehkha zir uar mi, India ramah pawh ziak leh chhiar thiam tamna a pakhatna hial ni thei kan nih avangin chu hmingthatna chu vawng nung zel a pawimawh tiin zirlai kalkhawmte a fuih a. Nu leh paten neihthinglungkhawngin School leh College-ah lehkha an fate an zirtir a, lawmthu sawi let ve theihna chu tha taka lehkha zir a, hlawhtlinna chang a, anmahni chawimawi let ve hi a ni, a ti.
Zirlaite tan tum dahsan a tul thu sawiin Pu Lalbiakzama chuan kum 1966 atanga 1990 vela kumtinin competitive exam-ah IAS tling Mizo pahnih/pathum an lang ziah thin thu leh “There is only one factory in Mizoram : that is IAS factory” tia Mizoram chu sawi a nih thin thu a sawi a. All India leh Central Service lama Mizo thalai tam zawk an tling tura a duh thu sawiin, vawiin a zirlai kalkhawmte chu an tum tisang a, hlawhtlinna sang zawk chang turin ngawrh taka zir chhunzawm zel turin a chah a ni. Chutihrual chuan zirlai zawng zawng IAS kan ni vek theih dawn lo avangin kan kawng theuha kan hlawhtlin theih nan heng – mahni inhriat chian, tuina zawng hriat, rilru puthmang dik, midang biakrawn tam, hmanhmawh loh leh ruahmanna tha neih a pawimawh hle a ni, a ti bawk. Zirna a ni emaw, kut hnathawh pawh ni se; thawhrimna, tumruhna leh teirei peihna tel lo chuan eng kawngah mah a hlawhtlin theih loh tih sawiin Speaker chuan chutiang mi ni tur chuan zirlai kalkhawmte a fuihin duhsakna a hlan nghal bawk.
