Saitualah Lok Sabha MP Hoin Sawrkar Laipui Scheme kalpui Dan Thlir Letna- Disha Meeting Neih A Ni
Vawiin khan DC Conference Hall, Saitualah District Development Coordination & Monitoring Committee (DISHA) chu an Chairman, Pu Richard Vanlalhmangaiha, Member of Parliament (Lok Sabha) hoin an thukhawm a, Sawrkar laipui (Centrally Sponsored Scheme) kalpuitu Department hrang hrang hmalakna te an thlirho nghal a ni.
Vawiin thutkhawmah hian Lok Sabha MP Pu Richard Vanlalhmangaiha chuan kalkhawmte hnenah lawmthu a sawi a, mipuite hmasawn nan Sawrkar laipui scheme pawimawh tak tak duan thin a ni, a ti a, heng scheme kalpui a nih dan te leh line department thawh chin te inhriatpawh tawn nan DISHA meeting hi quarter tin neih thin a ni tih a sawi. Sawrkar laipui scheme (Centrally Sponspored Scheme) te chu mipuite chawikan nan leh ram hmasawn nan a pawimawh hle a ni tih sawiin, heng scheme kalpuitu department hotute chu thahnemngai taka thawk zel turin a sawm nghal a ni.
Lok Sabha MP chuan Saitual Bawrhsap kaihhruaina hnuaiah zirna lam pawhin hma a sawn chhoh zel a beisei thu a sawi a, HSLC leh HSSLC exam-ah te pass percentage tha zawk Saitual district-in a neih theih nan tan lak a tul hle a ni, a ti bawk. Pu Richard Vanlalhmangaiha chuan Saitual District-a DISHA meeting tluang taka neih a ni thei chu lawmawm a tih thu a sawi a, line department te leh khawtlang hruaitute chuan thawhhona tha tak nei chhunzawm a, theih tawp chhuah zel turin a chah a ni.
Vawiin thutkhawmah hian department hrang hrang Rural development, Education, Agiculture, Horticulture, KVI, Social Welfare, Health & Family Welfare, Lead District Manager, UD&PA, Commerce & Industries, PHE, PWD, FCS & CA, CDPO, SP atang tein an department kaltlanga sawrkar scheme leh programme an kalpuite ngaihthlak a ni a. Hmachhawp an neih te leh scheme hrang hranga hlawhtlinna an lo neih tawh te an tarlang bawk a ni.
DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, an Scheme a hlawhtlin theihna tura thawhho dan kawng zawng tura din a ni. Vawiin thutkhawm hi Lok Sabha MP, DISHA chairman ni bawk, Pu Richard Vanlalhmangaiha chuan a kai hruai a, Saitual Bawrhsap, DISHA Member Secy ni bawk, Pu Srinivas Sadi bakah DISHA Member te leh khawtlang hruaitute an tel a ni.
