Lunglei District-ah vohbikte tan Disability Certificate/UDID Assessment & Certification Camp buatsaih a ni
Social Welfare, Women & Child Development Department leh Health & Family Welfare Department te ṭang kawp hma laknain vohbikte (Persons with Disabilities) tan Disability Certificate/UDID Assessment & Certification Camp chu April ni 22–24, 2026 chhung khan Lunglei District chhunga Thenhlum, Lungsen–II leh Tlabungah te buatsaih a ni.
He Assessment & Certification Camp-ah hian Bunghmun, Lungsen leh Tlabung RD Block chhunga khaw 39 aṭangin vohbik mi 303 te chu Disability Certificate/UDID pe chhuak tura endik an ni a. Vohbikte zinga Aadhaar siam ṭhat (update) ngaite chu siam ṭhatsak nghal an ni bawk.
Vohbikte tana buatsaih Assessment & Certification Camp hi Sr Specialist (Orthopedician) Dr Joseph Lalrindika Chawngthu kaihhruaina hnuaia kalpui niin, Social Welfare, Women & Child Development Department staff-te, Zoram Medical College & Hospital, Falkawn aṭanga Medical Team te, Civil Hospital Lunglei aṭanga Medical team te, Bunghmun ICDS Project aṭang leh Tlabung RD Block aṭanga Aadhaar Enrolment Operator te an tel.
