Fisheries Leh Central YMA In Thawhhona Thuthlung Ziak
Vawiin khan Fisheries Minister Pu Lalthansanga Pisa-ah Fisheries Department leh Central YMA ten Luidung Humhalh tura thawhhona thuthlung an ziak. Fisheries Department aiawhin Director Pi Zonuntluangi’n hming a ziak a, Central YMA aiawhin President Pu R. Lalngheta’n hming a ziak a ni. Fisheries Minister Pu Lalthansanga chuan Fisheries Department tan luidung zawng zawng vil a harsat thu sawiin, “Kan rama Tlawmngai pawl lian ber YMA ten kan luidung humhalh nachang hria a, Branch ten theihtawp a mahni huamchhungah hma an lo la thin chu a lawmawm hle a ni”, a ti. Lungrual taka Fisheries Department leh YMA te thawhhona hian rah tha a lo chhuah tawh thin a, kum 2 an thawhho lehna turah hian Fisheries Acts leh Rules hnuaiah awmze nei leh tangkai zawka Mizoram luidung hausakna hman kawngah hma an sawn phah ngei a beisei thu a sawi a ni.
Inkhawm kaihruaitu Fisheries Secretary Er. Lalrothanga chuan YMA te nena thawhhona tha tak an nei chu lawmawm a tih thu a sawi a. Sangha vulh kawnga farmer te hmasawn zelna tur leh Mizorama sangha tam zawk thar chhuahna atan hman tangkai a tul thu sawiin tha zawka thawhho zel a beisei thu a sawi a ni. Fisheries Department leh Central YMA hian kum 2021 atang khan Thawhhona Thuthlung hi kum 2 atan zel an lo ziak tawh thin a, tunah hian a tum 3 na atan thawhhona thuthlung hi an ziak leh a ni.
He thawhhona hian Mizoram luidung nungcha venhim leh humhalh kawngah nasa takin rah tha a chhuah zel a, tunah hian YMA Branch 93 zetin luidung humhalh bik an nei a. He an hmalakna avang hian Mizoram Luidungah sangha an pun phah mek zel a. Chu bakah luidung humhalh inzirtirna kawngah te, luidung venhim leh dan phal loh hmanrua hmanga sangha man chingte manchhuah kawngah Fisheries Department ten chak zawkin hma an lak theih phah a ni.
