Art & Culture Minister Pu C.Lalsawivunga’n Mizoram State Museum a hawng

Vawiin khan Pu C. Lalsawivunga, Minister Art & Culture chuan Mizoram State Museum chu a hawnga, Pu Lalmuanpuia Punte, MLA, Adviser to CM bakah officials dangte hawnnaah hian an tel a ni.

Minister chuan Mizoram State Museum hun rei tak atanga hna bul tan a parchhuak ta chu lawmawm a tih thu sawiin building sakna tura sum min petu Ministry of Culture, Govt. of India leh a chhung ruahmanna tur sum min petu UD & PA hnuaia SMART CITY te chungah leh a hlawhtlinna atana thawktu te zawng zawng chungah lawmthu a sawi a. Minister chuan museum chu thil hlui dahkhawmna hmun chauh ni lovin, hnam nun, hnam zia, hnam chanchin leh hnam rohlu te vawn thatna hmun pawimawh tak a ni a. Museum hi hun kal tawh leh tun inkara inzawmna leihlawn hlu tak a nih bakah Hnam identity leh cultural heritage humhalh leh hmasawnna kawnga pawimawhna lian tak kengtu a ni bawk a ni a ti.

Pu C.Lalsawivunga chuan Mizoram State Museum chu Multipurpose Museum a nih chhan chu gallery thlur bing bik awm lova chi hrang hrang pho chhuahna a nih vang a ni a ti a. Tunlai thangtharte leh zirlaiten museum atang hian thil tam tak kan zir chhuak zela, zirlaite tan Mizo History ti fiahtu zinga pawimawh tak a ni a. Museum tlawhtu tam zawk hi hi hnam dang,khualzin te an ni a, Mizote hian ngaihhlut nachang kan hriat thar a tul a ni a ti bawk.

Minister chuan Mizoram-in museum hi kan la nei tlem hle a, kan ngah lo chung pawha en tlak leh chhuanawm tak kan hawng thei chu lawmawm a tih thu a sawia,Mizo nihna chiang zawka kan hriatna, Mizo chanchin thu a kan hriat thin, a taka kan hmuh theihna a ni angin tlawh uara, ngaihlu turin zirlai leh thangtharte chu a sawm a. Museum a kan object neih 50% aia tam hi mi inphal tena museum a dah tura min pekte a ni a,Mizote tana rohlu mipui tam zawkin an hmuh theih tura phochhuah a nih theih nan chutiang bungrua neite tan museum-ah donate theih reng a ni a ti.

Minister chuan Mizoram State Museum hi kan ram, kan hnam darthlalang a nih avangin a enkawl kawngah mawh kan phurh veka,kan tu leh faten inzirna hmuna an hman tangkai theih nan tan lak a tula,museum tlawhtu apiangin hlawkna an chan zel a beisei thu a sawi a ni.

Vawiin hun hi Pu T.C.Lalkhuma, Joint Secretary, Art & Culture Dept chuan a kaihruaia, Pi Carol V.L.M.S. Dawngkimi, Director, Directorate of Art & Culture chuan report tawi pein Pu F.Lalthanmawia, Joint Director, Directorate of Art & Culture chuan lawmthu sawiin hun a khar a ni. Mizoram State Museum hawnnaah hian MPSC Chairman, Mizoram Sawrkar hnuaia Secretary sawmte, officials dangte, college leh school naupang leh sawmbik te an tel a ni.

Mizoram State Museum hi 18th September,2007 a sak tan a ni a, 2nd October,2012 khan zawhfel niin 25th July,2019 khan Art & Culture Dept hnenah hlan fel a ni. Mizoram State Museum