Special investigation team lawngtlai district thutkhawm
Vawiin khan Special Investigation Team, Lawngtlai District-chuan Deputy Commissioner Office Chamber-ah thutkhawm an nei a. Lawngtlai Bawrhsap Pu Donny Lalruatsanga chuan thutkhawm hi a kaihruai.
Pu Donny Lalruatsanga chuan Member kalkhawmte hnena lawmthu sawina a nei a. LADC leh CADC huamchhunga Riverine Reserved Forest leh Reserved Forest Areas- te venhim leh enkawl chu thil pawimawh tak a ni tiin, hemi kawngah hian theihtawp chhuah a tul hle a ni, a ti. Reserved Forest Areas leh Riverine Reserved Forest huamchhungah ‘land pass’ pek a awm em tih zawnchhuah chu thil tul tak a ni tiin, a bik takin LADC leh CADC – a Sr. Revenue Officer – te lo enfiah turin a chah a. Tunlai khawvelah Ramngaw humhalh kawngah sawrkar a intlansiak nasa tawh hle tih sawiin, Ramngaw humhalh pawimawhna hre reng bawkin, Bawrhsap chuan thahnemngai taka Riverine Reserved Forest leh Reserved Forest Areas- te humhalh a nih tur thu a tarlang a ni.
Thutkhawmah hian Reserved Forest Areas bikah chuan ‘Land Pass’ pekchhuah a awm lo tih report ngaihthlak a ni a. Riverine Reserved Forest – huamchhunga ‘Land Pass ‘ awm leh awm loh chu a hmunah kal a zirchian ni se tih a ni a. CADC huamchhungah Tuichawng Lui atanga 800 M chinah endikna kalpui a ni dawn a, LADC huamchhungah chuan Chhimtuipui, Tuichawng ( LADC Area) leh Sekulh Lui dung 800 M chinah endikna kalpui a ni thung ang. Zirchianna hi LADC leh CADC- a Revenue leh Forest Department ten kar thum chhung an kalpui ang a, report peih fel a nih hunah Mizoram State Sawrkarah report – an thehlut leh dawn a ni. Riverine Reserved Forest leh Reserved Forest Areas- humhalh turin Special Investigation Team ten theihtawp chhuah zel ni se an ti bawk a ni.
Vawiin thutkhawmah hian SDO (S), LADC leh CADC – a Sr. Revenue Officer, District Council Conservator of Forest, Deputy Conservator Of Forest (WL) te an tel thei a, Pu Donny Lalruatsanga chuan lawmthu sawiin hun a khar.
