Lungsen Aspirational Block-Ah Sampoornata Abhiyan 2.0 Kharna Leh “I Kawtkaiah Sawrkar” Hun Hman A Ni
Nimin khan Lunglei District chhunga Lungsen Aspirational Block-a hmasawnna tehfung (indicator) hrang hrang hlen chhuah a nih theih nana NITI Aayog hnuaia January 28 – April 14, 2026 chhunga beihpui thlak, Sampoornata Abhiyan 2.0 kharna leh Lunglei District Bawrhsap (Deputy Commissioner) bul tuma mipuite’n an kawtkaiah ngei an mamawhna zawna sawrkar an dawr theihna, “I Kawtkaiah Sawrkar” (Prashasan Gaon Ki Ore) hun chu Lungsen BDO Complex-ah buatsaih a ni.
Lungsen Block Development Officer (BDO) Pu Lalhruailiana Zote chuan Sampoornata Abhiyan 2.0 hi India ram puma Aspirational District 112 leh Aspirational Block 513-ahte kalpui a nih thu leh chu’ng zingah chuan Lungsen Aspirational Block pawh a tel tih sawiin, he campaign hi thla hnih leh a chanve chhung, January 28 aṭanga April 14, 2026 kalpui a nih chhungin Lungsen Block chuan kawng tam takah hmasawnna leh hlawhtlinna a hmuh phah thu a sawi a. Hei hi thawktute leh mipuite ṭan rualna ṭha tak vang a nih thu sawiin, lawm thu a sawi.
Lunglei Sub-Deputy Commissioner Pu Benjamin Lalrinawma pawhin Bawrhsap hma laknaa “I Kawtkaiah Sawrkar” buatsaih a nih dan sawi fiahin, District chhung hmun kilkhawr zawka mite’n an kawtkaia sawrkar department hrang hrang an dawr theihna chu hlu a tih thu leh mipui a tam thei ang berin chhawr ṭangkai se ṭha a tih thu a sawi.
Sampoornata Abhiyan 2.0 hnuaiah hian Lungsen Aspirational Block chhungah hriselna leh chaw ṭha (health and nutrition), zirna leh kut hna thawh kaihhnawih tehfung paruk (6 key indicators) – ICDS hnuaia naupangte chaw ṭha pek, Anganwadi centre-a naupang rih zawng leh san zawng dik (measurement efficiency), Anganwadi-a inthiarna leh tui thianghlim hnianghnar neih, sikula hmeichhe inthiarna ṭha tawk siam leh bawng vulhte hri danna (vaccination) pek ṭhat kawngah te hma lak niin, hmasawnna chhinchhiah tlak tak tak hmuh a ni.
Lungsena Sampoornata Abhiyan 2.0 khar ruala “I Kawtkaiah Sawrkar” hun buatsaihah hian department hrang hrang — DC Office, BDO Office, Health, AH & Vety, Horticulture, P&E, PHE, ICDS, FCS&CA leh Mizoram Rural Bank te’n stall hawngin, awlsam zawka mipuite dawr theih turin an inpho chhuak a. Lehkha pawimawh hrang hrang (Aadhaar, ST/Residential/Income Certificate, Job Card, Voter ID, Ration Card, etc.) siam thar/siam ṭhat te, bank account hawn thar leh service hrang hrang te, mihring leh ran inentir leh hri danna pek te, sawrkar ruahmanna hrang hrang chungchang inzirtirna leh inziah luhna te buatsaih a ni a. He’ng service hrang hrang chhawp chhuahte hi mi 500 chuangin an chhawr ṭangkai a ni.
