Lungleiah Flying Squad te’n tuialhthei leh eirawng bawlna gas zawrhna hmunte an endik
Lunglei District-a tuialhthei (Petroleum, Oil & Lubricants – POL) leh eirawng bawlna gas (Liquefied Petroleum Gas – LPG)-a harsatna a awm loh nana District Bawrhsap Pi Navneet Mann kaihhruaina hnuaia hma lakna kal zelah vawiin khan Flying Squad chuan Lunglei khawpui chhunga tuialhthei zawrhna (filling station) leh gas agency te a hmunah kal chilhin an endik.
Flying Squad hi an Leader, Sub-Deputy Commissioner Pu H. Lalthlengliana’n hovin, member-te – SDPO Pu R. Lalthankima, Supply Inspector Pu Andrew Lalramṭana, Legal Metrology Inspector Pu Kawldingliana Colney leh DO (DM&R) Pi Chuaupari Pachuau te an thawk chhuak a. Jedaz Filling Station (Zotlang), K. Sianglinga Filling Station (Zohnuai), MIZOFED Filling Station (AOC), El Pee Gas Agency leh Southern Gas Service te tlawhin, tuialhthei leh gas chhek khawl sa dinhmun te, mipuite tana an pek chhuah dan te an endik a. POL leh LPG chhek khawl sa (stock) chu a ṭhahnem thawkhatin, a lo thlenna lamah pawh harsatna a awm lo tih hmuh a ni a. Mipuite hnenah tluang taka sem chhuah niin, chhek khawl sa bak pawh a lo thlen belh zel beisei a ni.
Gas Agency te chuan tun hnaia mipuite harsatna tawh tam ber chu online-a LPG book kawngah a nih thu sawiin, consumer-te’n missed call-na tur number-a an call hnuah Delivery Authentication Code (DAC) an dawn theih loh avang te, call a tlang theih loh avang te leh Gas Agency-te’n system-ah an lo khawih ve ngai a awm ṭhin avang te’n gas book tumte’n harsatna an tawk ṭhin tih an sawi a. Gas hi single connection-ah ni 25 hnuah, double connection-ah ni 35 hnuah leh BPL connection-ah ni 45 hnuah chauh book nawn theih a nih thu leh DAC tel lo chuan gas pek chhuah theih a nih loh thu sawiin, system/khawl lam chian loh avang hian agent leh mipuite’n harsatna an tawk ṭhin tih an sawi a. Gas book chungchanga harsatna nei leh DAC dawng thei lote chuan nghak ringawt lovin Gas Agency-te pan ṭhin se, a hmunah chin fel theih tam tak a awm tih an sawi.
Lunglei District-a POL leh LPG hnianghnar dan dinhmun leh a kaihhnawih harsatna hrang hrang vil turin Joint Control Room siam niin, Flying Squad din a ni bawk a. Anni hian POL leh LPG dinhmun chu ni tin an thlithlai reng a. District thuneitute chuan POL, LPG leh ni tin mamawh bungruate chheprelh lo tur te, a mantova zuar lo tur leh mipui tichi-ai thei zawnga thu dik lo theh darh lo tur te’n sumdawngte leh mipuite an ngen a. Hemi kaihhnawiha harsatna leh mamawh thlen duh nei chuan phone number 9862653478-ah hian Lunglei JCR/DEOC chu biak pawh theih reng a ni.
