Serchhip district deputy commissioner paul l. Khuma hovin district ujjwala committee thukhawm
Vawiin khan Serchhip District Ujjwala Committee chu Deputy Commissioner Pu Paul L. Khuma hovin DC Meeting Hall, Serchhip-ah an thukhawm a, PMUY gas connection dilna tam tak tih khawtlai (pending) emaw, hnawl emaw a nih chhante sawi ho niin hmalak zel dan turte sawi ho a ni.
He thutkhawmnaah hian Serchhip District Civil Supplies & Consumer Affairs Officer Pu R. Zirliana hnen atangin Pradhan Mantri Ujjwala Yojana (PMUY) kalpui dan report ngaihthlak a ni a. Scheme guideline-in a sawi anga gas connection la nei miah lo chhungkuate chauh he scheme hian a huam avang leh dilna theh lutte zingah gas connection nei sa tam tak an awm avangin dilna tam tak chu hnawl emaw, tih khawtlai emaw a nih thu tarlan a ni. Harsatna dang sawi lan zingah tun hnaia Iran leh a chhehvel buaina avanga LPG khaihlak hlauhthawnna a len thu te, hei hian connection thar dil duhtu a tih tam hluai thu te, server-in a tlin loh phah hial thin thute a tel a. Heng bakah hian Consumer thenkhatte, an khuaa an let leh hnua biak pawh hleih theih loh leh koh chhuah hleih theih loh an awm thinte chuan hna a tih khawtlai thin thu sawi lan a ni bawk.
PMUY hnuaia e-KYC tih hun tura ruat chu March 31, 2026 thleng kha a ni a; Mizoram-ah ti hman lo tam tak an la awm avangin State Sorkar chuan Ministry-ah hun pawh sei (extension) dilna a thawn tawh a, chak zawka hmalakna kalpui a nih theih nan April thla chawlhkar lina (4th Week of April) atang hian PMUY beneficiaries-te tan ‘Physical Verification’ kalpui tum a ni.
