Minister Pu Lalnghinglova Hmar chuan Champhaiah Heritage & Cultural Center, Eco Resort Experience at Keilungliah leh Construction of Artificial Turf lungphum a hawng
Sports & Youth Services leh Tourism Minister Pu Lalnghinglova Hmar chuan vawiin khan Thangtea Hall, Champhai Kahrawtah lungphun hawnna hun neiin lungphun pathum – Heritage & Cultural Center (Champhai Vengsang), Eco Resort Experience at Keilungliah leh Construction of Artificial Turf (New Champhai) lungphum te chu khuallian niin a hawng.
Khuallian Pu Lalnghinglova Hmar chuan heng lungphun a hawng thei hi lawmawm a tih thu a sawi a, sawrkar hmalakna a nih rualin sawrkar hi a puitu tur a ni a, a thawktu ber leh hlawkna teltu ber chu mipui an ni a, Community based tourism an kalpui zel duh thu a sawi. Heritage & Cultural Centre chuan meeting hmunhma tha tak a nei ang a, conference hman nan mi tam takin an hmang dawn tih a sawi a. Vantlang mipuite a enkawlna leh venhimna kawngah pui turin a sawm. Eco-Resort at Keilungliah pawh khualzin tam tak tan ei leh in leh riahna hmun tha tak a awm belh phah ang a, Champhaiah mi a hip belh ngei a beisei thu a sawi. Champhai mipuiin khualzin dawnsawn dan an thiam chhoh a ngai dawn hle a, theih ang anga inzir turin mipuite leh khawtlang hruaitute a fuih a ni. Champhaiah hian District Tourism Office hawn a ni dawn tih a puang a, Champhai Tourist Lodge siamthat tur thu a puang bawk.
Khuallian chuan Artificial Turf sak chungchang sawi chhunzawmin New Champhaia football field tha tak an nei thei tur hi a lawmpui thu a sawi a, inkhel hmuhnawm tak tak buatsaih a nih ngei a beisei thu sawiin Champhai District Football Association (CDFA) leh khawtlang mipui te’n tha taka enkawl turin a sawm a ni. Hetiang zat ni khata project hawn theih a ni hi Champhai tana ni chhinchhiah tlak a ni tih sawiin Champhai mipuite’n anmahni ta tur a ni tih hre reng turin a chah a ni.
He hun hi Tourism Director Pi R. Lalrodingi’n a kaihruai a, MTDA Executive Engineer Pi Esther Lalduhsaki’n Heritage and Cultural Center leh Eco Resort Experience at Keilungliah chungchang technical report pein Mizoram State Sports Council Secretary Pu Henry C. Lalrawnkima’n Construction of Artificial Turf chungchang technical report a pe a ni. Champhai Bawrhsap Pu Mohammad Aaquib chuan thu a sawi bawk.
Heritage & Cultural Center leh Eco Resort Experience at Keilungliah hi Tourism Department hmalakna niin Swadesh Darshan 2.0 hnuaia hmalakna a ni a, Eco Resort Experience-ah hian cottage te, naupang infiamna hmun te leh khualzin mamawh hrang hrang siam a ni dawn a, Heritage and Cultural Center-ah hian multipurpose hall te, lounge te, meeting room te siam a ni ang. Construction of Artificial Turf hi Ministry of Tribal Affairs hnuaia PMJVK scheme hmanga Sports & Youth Services hmalakna a ni a, inkhelhna mual tha tak siam a nih dawn bakah mipui thutna tur pavillion te, hungna te leh inthlakna leh inthiarna hmun tha tak tak siam tum a ni.
