Khawzawl District Sericulture Office-in Silk Samagra-2 hnuaiah pangang khawitute tan training buatsaih
Vawiin khan District Sericulture Office, Khawzawl chuan Pi Melody C. Vanlalruati, District Sericulture Officer kaihhruaiin Khawzawl District chhunga Sericulture beneficiaries – Mulberry, Muga leh Eri khawitu mi 126 te tan Zuchhip Branch YMA Hall-ah training an buatsaih a. Pu HT Zothanmawia, Pi Malsawmdawngi, Pu Kenneth Hmingchungnunga leh Pi Lalramthari ten powerpoint presentation hmangin training an pe.
Vawiin programme-ah hian Eri leh Muga Project kalpui meka fund release tawh zatte ennawn niin, hma lak leh zel dan turte sawi ho a ni a. Mulberry-ah Khawzawl District hi Mizoram-a silk cocoon thar hnem ber kan nih leh theihna tura ruahmanna siam chungchang zirtirna neih a ni a, khaw thar 11-ah luh tum a ni bawk a. Mizoram-ah Oak Tasar Champhai District chauha awm thin chu Khawzawl District-ah pawh kalpui tan tum ve mek a nih dante zir ho a ni bawk.
Farmer-ten silk cocoon hi quintal tam tak pawh thar se Sericulture Department in an lei vek duh avangin a hralhna kawngah chuan harsatna a awm loh thu inhrilh nawn leh a ni.
