Lunglei West bialtu MLA Pu T. Lalhlimpuia’n Lunglei khawpui chhunga tuiluankawr siam ṭhat dan tur a enfiah
Nimin khan Public Works Department (PWD) Minister puitu, Lunglei West bialtu MLA Pu T. Lalhlimpuia chuan Lunglei khawpui chhung veng hrang hrang fang kualin, khawpui chhunga tuihawk kawng bo tam tak avanga harsatna awm ṭhin leh a siam ṭhat theih dan tur a hmunah a enfiah.
MLA Pu T. Lalhlimpuia hi Lunglei Municipal Council (LMC) Vice Chairman Pu K. Lalrinawma leh Councillor ṭhenkhatte, Additional Superintendent of Police Pi Sarah Lalrinkimi, Sub-Deputy Commissioner Pu H. Lalthlengliana, PWD Lunglei Road Sub-Division–I SDO Pu Lalruatzela Pautu, UD&PA JE Pu T. Ramropuia leh Traffic Incharge Pu Lalṭhabuanga te’n an ṭawiawm.
PWD Minister puitu MLA Pu T. Lalhlimpuia chuan Lunglei khawpui chhung hmun hrang hranga tuihawk kawng bo tam tak chu tuiluankawra luan luhtir turin chak taka hma lak rum rum chu a har dawn tih sawiin, tuiluankawr hnawhtu siam ṭhat theih lai lai chu a rang lama siam tum a nih thu a sawi a. Tuiluankawrah PHED connection pipe eng emaw zat a awm bawk avangin a siam ṭhat kawngah pawh PHE Department te nen inthuruala hma lak a ṭul dawn tih a sawi a. Lunglei khawpui chhunga tuiluankawrte chu awmze nei leh ṭha zawka siam ṭhat vek a ngai tih sawiin, tuiluankawr ṭha tak siam turin LMC, PWD, UD&PA leh PHE Department te nen ṭang rualin project lian zawk ruahman ni se ṭha a tih thu a sawi.
