Legislative Assembly Speaker Pu Lalbiakzama’n LushAIGent tlangzarh
Vawiin khan Mizoram Legislative Assembly Speaker Pu Lalbiakzama chuan LushAIGent : Agentic AI chu BSI Hall, Aizawlah a tlangzarh.
Pu Lalbiakzama chuan Mizoramin AI-ah bungthar a kaina hun pawimawha a tel chu lawmawm a tih thu sawiin “Hetiang ang thiamna ril bik nei Mizo chhulchhuak kan nei hi ka chhuang hle a ni” a ti. Hun hmang tlem zawk leh chhanna dik zawk chuan mihring nun a ti zangkhai a, a lo thlawna sum leh pai leh hun luangral tur a veng nghal ṭhin a, hlawkna min pe pah nghal bawk a ni, tih sawiin chu kan mamawh chhanna chu LushAIgent Agentic AI hian a paipawn a ni, a ti a. Agentic AI bikah phei chuan Mizoram mai ni lo, India ramah a hmasa ber tur tlangzarh a ni ta chu lawmawm a tihzia zawiin Zofate tan malsawmna a nih ngei a beisei thu a sawi a ni.
LushAIgent hi Mizo mipuite, a bikin Sap ṭawng emaw Hindi emaw thiam lutuk lote pawhin an hman ṭangkai theih tura duan a ni a. Mizo ṭawngin ṭha takin a biak theih a, a hmangtu zawhnate Mizo ṭawng ngeiin, fiah takin a chhang let thei a ni. Mizo ṭawng leh English bakah Hindi, Bengali, Tamil, Telugu leh ṭawng dangte tiamin India ram ṭawng hrang hrang 12 lai a thiam a.Type kher ngai lovin Voice Note hmanga biak theih a ni.
Tawng danga mi dangin thu an thawn rang takin a hmangtu ṭawng thlan (entirnan, Mizo tawng)-in a lo letling nghal zung zung thei a. Ṭawng danga thuziah te pawh fiah tak leh awmze nei takin a letling thei a. Sap ṭawng emaw ṭawng danga a hmang tuin thu a ziah sa pawh tawngkam mawi zawk leh grammar dik zawkin a chulmam sak thei a ni.
