Health minister pi lalrinpuii’n lungleiah ncc fest & parasailing camp hmasa ber a hmanpui
Vawiin khan C. Ṭhuamluaia Mual, Lungleiah 2 Mizo Battalion National Cadet Corps (NCC) bul tuma Mizorama NCC Fest & Parasailing Camp hmasa ber kalpui mek chu Health & Family Welfare Minister Pi Lalrinpuii chuan Khuallian niin a hmanpui.Minister hi Lunglei High Powered Committee (HPC) Vice Chairman Pu V. Malsawmtluanga, Lunglei Municipal Council (LMC) Vice Chairman Pu K. Lalrinawma leh District official-te’n an ṭawiawm a. 2 Mizo Bn NCC Commanding Officer Col. Sagar K. Mohanty hovin NCC hotute, sipai hotute leh NCC Cadet-te’n lo dawngsawngin, NCC Cadet-te’n Guard of Honour nen zahna chibai an lo buk.Minister Pi Lalrinpuii chuan Mizorama NCC Fest & Parasailing Camp hmasa ber Lungleiin a dawlah a tel ve thei chu lawmawm a tih thu sawiin, a huaihawttute ṭhahnem ngaihna leh inpekna fakawm a tih thu a sawi a. Viksit Bharat 2047 hlawhtlin nan Mizoram sawrkar chuan mipui sawrkar, sawrkar ṭha leh lang tlang kalpuiin State chhunga hmasawnna rualkhai tak a awm theih nan theih tawp a chhuah tih sawiin, Lungleia Mizoram State University din tura ruahmanna leh hmun hrang hranga hmasawnna hna thawh kal mek te, Mizorama NCC Fest & Parasailing Camp hmasa ber chhim lama buatsaih te chu a nem nghettu a nih thu a sawi a. Viksit Bharat 2047 hlawhtlinna chu ṭhalaite, mi retheite, hmeichhiate leh kut hna thawktuteah a innghah thu sawiin, ram hmasawn nan ṭhalaite tihchak leh tihhmasawn a pawimawh thu leh NCC chu chumi atana hmanraw ṭha ber pakhat a nih thu a sawi a. Ṭhalaite chu ram hma hun innghahna an nih angin khawvel thiamna, inrelbawlna leh ei leh bar dinhmun danglam zel mila inher rem a, an thiamna leh theihna tuai hriam zel tur te, ram inpumkhatna vawng nung zel tur leh ram tana mi chhenfakawm nih tum zel tur te’n a chah.
He hunah hian NCC Alumni te, NCC leh ṭhalaite tana thawh hlawk tak takte leh ram pum huapa mi hming ṭhate chawimawina hun hman niin, Khuallianin NCC ai awhin chawimawina thilpek a hlan a. Khuallian hian stall hrang hrang fang kualin, stall nghaktute nen an inkawm a. 23 Assam Rifles Pipe Band te’n rimawi kal rem an entir bakah, NCC Cadet-te’n hnam lam an entir a. Tlai lamah zaithiam lar tak takte nen zai lam kutpui (concert) hun hman a ni bawk.
Mizorama NCC Fest & Parasailing Camp hmasa ber hi May ni 5–11 chhungin Lungleiah kalpui mek a ni a. NCC chungchang hriat zauna tur leh NCC zawm tura ṭhalaite fuih phurna tura ruahman niin, North East state hrang hrang aṭangin NCC cadet ṭhahnem tak an fuan khawm a. May ni 5 aṭangin 2nd Bn MAP Ground, Luangmualah Parasailing Camp hi kalpui ṭan niin, NCC Fest hi May ni 8 leh ni 9-ah C. Ṭhuamluaia Mualah nghah a ni thung.
NCC Fest-ah hian sawrkar hotu pawimawh leh sipai hotu liante nena inkawmna hun (interactive session) te, NCC chhuak (alumni)-te nena inkawmna hun te buatsaih niin, stall hrang hrang –NCC thil leh hriat tur pawimawh pho chhuahna, Border Security Force, Assam Rifles leh Territorial Army Bn te ralthuam pho chhuahna leh District Legal Services Authority leh District Disaster Management Authority stall te buatsaih a ni a. Mizoram tualchhuak puan leh themthiam thil mawi tak tak bakah, Mizo ei tur chi hrang hrangte chhawp chhuah a ni bawk.
