Cooperation Department, NABARD leh MCAB hotute’n Mizoram Larsap an kawm
Vawiin khan Cooperation Department, National Bank for Agriculture and Rural Development (NABARD) leh Mizoram Cooperative Apex Bank (MCAB) Ltd., hotute chuan Larsap, General (Dr) Vijay Kumar Singh, PVSM, AVSM, YSM (Retd) chu Lok Bhavan, Aizawlah hmuin, tunhnaia “Scheduled Bank” dinhmuna Mizoram Cooperative Apex Bank (MCAB) Ltd. hlankai anih chungchang bakah hmalakna dangte an sawipui.
Larsap General (Dr) Vijay Kumar Singh chuan Mizoram Cooperative Apex Bank Ltd.-in Scheduled Bank dinhmun pawimawh tak a thleng thei chu a lawmpui thu sawiin, scheduled bank an nih tawh avangin State Sawrkar hnuaia department-te pawhin dan ang taka an dawr theih tawh dawn thu a sawi a. Cooperative Bank-te chu mipui nawlpui tana dawr theih an nih avangin tun aia hmasawn lehzual tura theihtawp chhuah turin a chah a ni.
He hunah hian Pu Udit Prakash Rai, Commissioner & Secretary, Cooperation Department; Pu John LT Sanga, Registrar of Cooperative Societies (RCS); Pi Pankaja Borah, GM, NABARD-te bakah, Mizoram Cooperative Apex Bank Ltd. atangin Pu Lalnunsanga, Chairman; Pu Lalrinchhana, Vice Chairman; Pu Rosiamliana Ralte, Director; Pu P. Lalsawmliana, CEO leh Pu Vanlalhriata, DGM te an tel a ni.
Mizoram chuan Banking sector-ah bung thar kaiin tunhnaiah Mizoram Cooperative Apex Bank Ltd. chuan ‘Scheduled Bank’ status a hmu thar a. Gazette of India, April ni 15, 2026-a tarlan a nih danin Mizoram Cooperative Apex Bank Ltd. chu Second Schedule of Reserve Bank of India Act, 1934 ah telh a ni dawn ta a ni.
Mizoram Cooperative Apex Bank Ltd. hi July 31, 1982 khan din a ni a. Tun dinhmunah Apex Bank hian branch 35 leh ATM 45 a nei mek a. Deposit cheng vaibelchhe 1930 neiin, loan cheng vaibelchhe 1272 an pe chhuak a, sum dahluh leh loan pek chhuah khaikhinna Credit-Deposit (CD) ratio hi 66% a ni a, Mizorama Bank-te zinga loan pe chhuak tha berte zinga mi a ni mek.
