Chief minister-in mizoram sangha khawitute intawhkhawmna telpui
Vawiin khan Fisheries Department bultumin Mizorama Sangha khawitute intawhkhawmna (Mizoram Fish Farmers’ Meet) Dawrpui Multipurpose Hall-ah buatsaih a ni a. Chief Minister Pu Lalduhoma chuan telpuiin Pu Lalthansanga, Fisheries Minister chu khualzahawm a ni. Thusawiin Pu Lalduhoma chuan, Mizoramah hian Sangha khawi theihna ram hi Hectare 24,000 vel kan nei a. Chung zinga ram hectare 6,000 velah chuan Sangha dil kan nei mek a. Za zela 25 vel chauh a la ni a. Phur za hmun nei chunga phur 25 thar theihna chauh la siam ang kan ni. Sangha tharchhuah lama Mizoram harsatna langsar chu Dil kan la nei tlem a, kan tharchhuahte dah thatna kan la nei tha tawk lo va. Kan dil neih mekte atanga kan tharchhuah that zawng (Fish Productivity per Hectare) a la hniam bawk a. Vawiina kan ngaihtuah hmasak tur nia lang chu kan thar hlawk tawk em? tih hi a ni. Sangha dil thar kan laih belh thei rih lo a nih pawhin kan neih chhunte thar hlawktir lamah tan kan la thei a ni.
Sangha dil neituten hlawk zawka kan tharchhuah theih nan tunlai thiamna thar ber ber kan hman ve a ngaiin ka ring a. Sangha hrisel zawk neih dan te, a chaw lama kan hriat tur chi te, Dil enkawl dan dik leh kan hnathawhna lama kan mamawh apiang kan ngaihven a, kan hriat ve zel a tha a. Vawiina kan intawhkhawmnaah hian chutiang lam chu in lo sawiho turah ka ngai a ni. Sangha tharchhuah tam lama hma kan sawn theih nan kan Minister kaihhruaina hnuaiah thapui kan thawh mek a. Scheme hrang hrang Blue Revolution te, Prandhan Mantri Matsya Sampada Yojana (PMMSY) leh Bana Kaih (Handholding) Scheme hmangtein hma kan la a. PMMSY 2.0 hi kalpui chhunzawm kan beisei avangin a lo chhuah huna kan kalpui ve nghal theih nan Action Plan pawh kan siam a. Mizoram Flagship Scheme Bana Kaih thawhkhatna CM Special Package atangin Sangha dil siamtu mi 201 te banah kan kai a. Loan Component hmangin mi 14 te banah kan kai bawk a. A thawhhnihna hi nikum September thla aṭang khan kan tan leh a, CM Special Package hmangin mi 27 te kan thawhpui a, Loan component atangin mi 5 te kan thawhpui leh tawh a. Sangha dil kan neih belh chho zel a.
Thawhhnihna hi la kalpui mek a ni a, dilnate pawh hi thehluh theihin kan hawng reng a. Miin thawhpuitlak ruahmanna (Project Proposal) a neih kha chuan kan thawhpui zel mai dawn a ni.Hma kan lak chin chinah kan thawhpui Sangha dil neituten in thawk tha thawkhat tih kan hria a. In chungah lawmthu ka sawi a ni. Kan sangha tharchhuahte kan bazarah awlsam taka kan hmuh theih nan Chain Cold Storage Facility kan mamawh a, a tam thei ang ber neih kan tum dawn a ni.Central Scheme leh Bana Kaih hmanga kan thawh phak bak, hmalakna tur tul si tea hmalak theih dan a awm em? tiin kan Minister leh Department lama kan mithiamten ngaihtuahna an seng mek a. An ruahmannate han duang fel se, a project details te, sum leh pai kan mamawh zat turte han hre chiang hmasa ila. Kan tih theih dawn chuan tihhlawhtlin ngei pawh kan tum dawn nia, a ti. Pu Lalthansanga, Minister pawhin thusawiin, Fisheries department hi mumal lehzualin kan kal tan a, induhsakna hmanga tanpuina inpek mai thin ang chi tihbo tumin kalphung thar kan siam a. A phute chauhin sangha khawi tanpuina hi dawng se kan duh a ni, a ti. He intawhkhawmnaah hian Bank lama thawktuten sangha khawitute tana bank loan lak theih dan zirtirna an nei a, farmers ten an harsatna hrang hrang sawichhuahna an nei a, sangha enkawl dan zirhona an nei a. Sangha khawitu hlawhtlingte thusawi leh lawmman semna an nei bawk.
