Chief minister-in dialysis thar hawng
Vawiin khan Chief Minister Pu Lalduhoma chuan Serchhip District Hospital-a Dialysis Unit thar a hawng. Thusawiin Chief Minister chuan khawtlang hruaitute inpekna zarah Serchhip District Hospital-ah Dialysis khawl hi hawn a lo ni ta a, tha taka hna a thawh theih nan mamawh dang la awm angte pawh ngaihtuah belh zel a ni ang. A thawktu tur ten theitawp chhuahin, Pathian rawngbawlna a ni tih hre chungin lo thawk ula, natna khirh tuar, inenkawlna nei si lo an lo kal pawhin lo ngaihsak hram hram ang che u. Thawktute inthlahdah vanga damlote tawrhna hi thleng lo se, hah chung chung pawhin, nunna chhanna a nih avangin lo thawk hram zel ang che u, tiin a chah a. Kan khawl leh thawktute Pathianin malsawm che u sela, nangmahni kal tlanga damna a lo thlen ka duh a ni, a ti.
Mizo te zingah AIDS, cancer leh natna khirh tak tak vei kan tam ta lutuk hi kan duh kan thlang sual deuh em ni aw a tih theih a. Natna tam tak kan pumpelh theih a awm a, kan nun kan uluk hi a tul a ni. Pathian hian kan hrisel hi a phal a, kan hausakte pawh a phal a ni tih hi hria ila, kan damna hi Pathian hnenah a awm a, kan thing leh mau leh nungchate pawh zalen se, mipuite pawh hrisel ila, Pathian malsawmna kan dawng zel ang a ti. Serchhip damdawi in building sak pawhin hma a sawn ve zel a, Main Building tur sakna tur crore 50 dawn fel a ni tawh a, tender chhuah a, hnathawh chhunzawm thuai a ni ang, a ti bawk. Dr. Lalhriatpuia Chhangte, SMO chuan Techincal report a pe a, khawl hi 2025 ah an dawng a, thawktu Doctor 1,Technician1, Staff nurse 2 leh RO incharge 1 in an enkawl dawn a. Naktuk (2.4.2026) atangin dialysis hi tih tan nghal tum a nih thu a sawi.
Khawl 2 hmangin, chawhmaah mi 2 leh chawhnu mi 2 a vaiin ni khatah mi 4 an enkawl thei dawn a.chawlhkar khatah mi pakhat tan vawi 2 a tih theih dawn a ni. Sawrkar chawlhah leh thla tin inrinni vawi hnihna an awl thin ang. Natna khirh bik Hepatitis leh HIV veite erawh chu a hranpaa enkawlna pek ngai an nih avangin dialysis hi an tih sak thei rih dawn lo a ni.Pi R. Vanlalhmangaihzuali, UDC chuan Financial report pe in Dialysis khawl bunna senso atan hian MLA fund Rs. 15,04,000 leh Technician hlawh tur Rs. 1,38,000 an dawn thu a sawi. He hun hi District Medical Siperintendent Dr. ZD Lalmuanawman a kaihruai a. Serchhip DC Pu Paul L Khuma, SP Pu Gavit Gogna bakah khawtlang hruaitute an tel a ni.
