Lungleiah Healthy Lunglei App tihlar beihpui thlak dan tur sawi ho a ni
Vawiin khan Lunglei DC Office, Health & Family Welfare leh I&PR official-te leh Young Mizo Association (YMA) Sub-Headquarters Lunglei hruaitute chu Lunglei District Bawrhsap Pi Navneet Mann hovin a hna thawh pindanah an ṭhu khawm a. Lunglei District mipuite’n hriselna ṭha zawk an neih theih nana Healthy Lunglei District Campaign hnuaia hma lakna leh mahni awm hmun aṭanga awlsam taka inentirna appointment lak theihna leh online-a damdawi chah theihna tura tlangzarh tak, LushAI Healthy Lunglei (LHL) App mipuite’n ṭangkai zawka an hman theih nana tihlar beihpui thlak tur chungchang an sawi ho.
Healthy Lunglei App chungchanga Information, Education and Communication (IEC) campaign chu May thla aṭanga kalpui tum niin, ni sawm li chhung (40 Days Campaign) kalpui tura ruahman a ni a. Campaign chhung hian YMA branch hrang hrang leh college-ah te hriselna dinhmun endikna (health screening) te, hriselna leh LHL App chungchang inzirtirna leh intihsiakna te buatsaih a ni ang a. Ni 40 chhunga campaign zawh hnuah App download tam leh hmang ṭhate hnenah lawmman siam a ni bawk ang.
LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk
