Chawnpui Branch YMA Day Leh Lawmthu Sawina Hun Pu K. Sapdanga, UD&PA Minister In A Hmanpui
Chawnpui Branch YMA chuan YMA Day leh Aizawl City area YMA Branch Fai lawmman Pakhatna an dawn lawmna chu June ni 15, 2026 chawhma dar 11 khan an hmang a. Pu K. Sapdanga, UD&PA Minister, Pu TBC Lalvenchhunga, Bialtu MLA & Adviser to CM (Finance) leh Pu PB Lallawmzuala, AMC corporator leh UD&PA Department official ten an hman pui.
Chawnpui Branch YMA hnenah hian kum 2025-26 a UD&PA leh Central YMA buatsaih, Aizawl City Area Branch YMA Fai Inelna ah lawmman pakhatna chu kumin Chapchar Kut ah khan hlan an ni a. He lawmman an dawn leh tun hnai a UD&PA Department hnuaia Chawnpui Veng chhunga hmasawnna hna thawh hrang hrang avanga lawmthu sawina inkhawm an buatsaih a. Chawnpui veng a Sawrkar in hma a lak na te avanga lawmthu sawi na atan veng fai inelna ah hian theih tawp chhuah in, Local Council, NGO, Kohhran hrang hrang leh veng chhunga sikul aiawh te nen Chawnpui Faina Beihpui Komiti an din a. SIPMIU in bawlhhlawh thliarhran (segregation) ah pilot area ah a lo thlan tawh an nih avangin hmalak a nawm thu an sawi a. Veng fai ber lawmman an dawn chu an ngai hlu in an hmalakna a hlawk thlak an tih thu an sawi.
He hun hman pui tu Pu K. Sapdanga chuan Chawnpui veng in hlawhtlinna lawmawm tak an dawn leh sawrkar laka lawmthu sawi nachang an hria chu fakawm a tih thu a sawi a. Veng fai ni zel tura tan la turin a sawm a. Solid Waste Management Rules thar hman turah pawh nasa leh zual a tan la turin a ngen a ni.
Khuallian chuan YMA in a lung a len thu sawi in “Pathian in kan Missionary te kaltlangin kum 90 mei mit lova, a hniam zawng nilova hmasawn zawnga kal zel thei Pawl ropui, hnam dangte neih ve loh pawl, YMA min din sak hi Zofate kan vannei hle a ni” tiin YMA kaltlangin khawtlang rawng bawl zel turin kal khawm te a sawm bawk a ni.
Pu TBC Lalvenchhunga, Bialtu MLA pawhin Khual Zahawm niin he hun hi a hman pui a. Chawnpui veng a sawrkar hmalakna hrang hrang ah veng mipui te an lawm thiam thin zia leh an thil dawn te an phu a tih thu a sawi.
