AMC inthlang turin engkim peih fel ani tawh
Aizawl Municipal Corporation huam chhung Ward 19-a Corporator inthlanna naktuk Thawhlehni a vote thlak tur atana inbuatsaihna engkim peih fel a ni tawh.
State Election Commissioner Dr. H. Lalthlangliana’n a sawi danin Polling Party zawng zawngte tukin zingah an duty na hmun pan turin an inruahhman fel vek tawh a, hemi hma lam hian kum upa leh damlo chaklo zual vote thlakna hmun pan thei lote tana a hmuna pan chilha vote thlakna (Home Voting) ruahhmanah vote 2,594 a tla tawh a, election duty puala vote thlakna siamah vote 1,328 thlak lo ni tawh bawk a ni. Naktuk hian zing dar 7 atanga tlai lam dar 5 thleng vote thlak hun hawn a ni dawn a, ward 19 a polling station 257-ah electronic voting machine (EVM) hmanga vote thlak a ni dawn a ni.
AMC inthlanna tura vote nei awm zat chu hmeichhia nuai 1, sing 2, sang 9 leh 656 leh mipa nuai 1, sing 1 leh 333 an ni a, an vaiin vote nei hi mi nuai 2, sing 3, sang 9 leh 989 an awm a, mipa ai hmeichhia an tamna chu 19,323 a ni. Vote awm tamna ber chu ward 18-na niin, vote 18,906 an awm a. A tlemna ber ward 8-na-ah vote nei mi 7,975 an awm thung. AMC huam chhungah hian hian a veng bil ang a vote tamna ber chu ward number 2-na huam chhunga Bawngkawn Veng a ni a, vote 6,442 an awm a ni.
