MUHCS ah inziak lut an pung zel
Mizoram Universal Health Care Scheme(MUHCS 2.0)-a inziah luh theih hun pawhsei a nih hma April ni 15 thleng khan mi 31,671 an inziaklut tawh. Mizoram State Health Care Society (MSHCS) Chief Executive Officer (CEO) Dr Lalhriatzuali Ralte hnen atanga thudawn danin, kumin February ni 16 atanga tun thla April ni 15 tlai dar 3 thleng khan MUHCS 2.0 hnuaiah hian online leh offline kaltlangin mi mi 31,671 an inziaklut tawh a. Chung zinga mi 31,333 te chu online kaltlanga inziaklut niin, mi 338 te chu offline a inziak lut te an ni a. MSHCS Ceo Dr Lalhriatzuali Ralte chuan mipuite chu MUHCS a inziah luh hun tawp ni May ni 15 chu bawhpelh lo turin a chah a, hemi hnu hi chuan la inziaklote tan grace period an hawng tawh dawn lo tih a sawi a ni.
Mizoram sawrkarin a ruahmanna hmasaah chuan kumin February ni 16 atanga tun thla April ni 16 thleng khan MUHCS 2.0 hnuaiah man chawia online-a in ziah luh hun hawn a ni a. Tun thla April ni 1 atang khan MUHCS 2.0 hi a taka hman tan niin, April ni 2 atang khan Internet that lohna khua 269-a health sub centre-ah te offline hmanga inziah luh theihna hawn tan a ni bawk a. Hetihlai hian Ningani liamta khan Mizoram sorkar chuan MUHCS-a inziah luh theih hun hi thla thar May ni 15 thleng a pawtsei a ni.
MUHCS 2.0-ah hian cheng 2,500, cheng 5,000 leh cheng 10,000 te a inziah luh theih a ni a. Hei hian chhungkaw khat tan cheng Nuai 5 hu thleng man chawi lova inenkawlna a huam a, sorkar hnathawk nghet zawng zawng chu inziah luh ngai loin an tel sa a, an hlawh atangin thla tin pawisa an thawh dawn a, Civil Pension leh AB-PMJAY (Golden Card) hmangte tan pawh a hranpaa inziahluh ngai loin, MUHCS-ah an tel sa bawk a ni.
