AMC inthlan lo awm tura campaign hun chu khar a ni
Nimin tlai dar 5 atang khan naktuk thawhlehni zing dar 7 atanga vote thlak tan tur Aizawl Municipal Corporation (AMC) inthlan atana vote zawn hun chu khar a ni.
State Election Commission chuan inthlan campaign phal loh hun ‘Silent Period ‘ puangin hei hian nimintlai dar 5 atanga vote thlak zawh hun April ni 21 tlai dar 5 thleng a huam ang. Hemi chungchang a sawifiahna-ah State Election Commissioner Dr H. Lalthlangliana chuan, Vote thlaktuten tuma chim buai lova zalen taka rilru an hman theih nan Silent Period hi puan a nih thu sawiin, Political Party te tan hun rei tak campaignna hun hawn ani tawh a, vote thlak dawn hnaite hi chu Voter te chan pual, an duhthlanna felfai an siam theihna atana inbuatsaih hun anih avangin Voter te chanvo liau liau-a a ni a ti a. He hun hi ti buaia campaign tum talh hi dan bawhchhiatna a nih bakah Voter-te zah lohna a ni a ti. Voter-te pawhin anmahni hmin tuma la campaign ru fo te chu Voter te zahlohna, anmahni ngaineptu an ni tih hrethiama an lo dawnsawn loh thiam a ngai a ni a ti a. Political Party zawng zawng te chu Silent Period ngai pawimawha voter chanvo zahthiam turin a ngen a ni.
SEC thuchhuah tarlan danin Silent Period chhung hian Political Campaign-na ang chi vantlang inkhawmte, vote zawng tura mi ina luhte, Campaigna lam hawi thuziak tar leh Printed leh Electronic Media hmanga vote tura insawmna ang chite, mipui ngaihdan lakte khap a ni.
He tih lai hian political party hrang hrangte chuan inthlan campaign beihpui thlak hi an khar tawh a. Zirtawpni khan Mizoram Pradesh Congress Committee (MPCC) chuan Vanapa Hall kawtah kharin an president Pu Lal Thanzara’n a khar a. Inrinni khan MNF chuan ward tinah campaign hi kharin rorellai ZPM party chuan Inrinni tlai khan an party hruaitu Chief Minister Pu Lalduhoma hovin an khar a ni. AMC inthlan lo awm turah hian rorel lai ZPM, bakah MNF leh MPCC te chuan bial/ward 19 an chuh kim vek a. BJP chuan bial 11-ah candidate an nei a. Independent candidate an awm lo. AMC bial/ward 19 zinga 6 chu hmeichhe tan chauha chuh theih tura ruat ni mah se, tu pawhin a chuh theih bialah hmeichhe candidate 7 an awm a, ZPM leh MPCC hmeichhe candidate 3-te’n tu pawhina chuh theih bial an chuh a, MNF hmeichhe candidate pakhatin a chuh bawk. Tun tum AMC inthlan chuhtu mi 68 zinga 28 te chu hmeichhia niin, INC leh ZPM-ah hmeichhe candidate 9 ve ve, MNF-ah 7 leh BJP-ah 3 an awm a ni.
