Health minister leh power minister ten dulte h&wc leh kawlkulh phc an tlawh
Vawiin khan Health & Family Welfare Department Minister Pi Lalrinpuii leh Power & Electricity Department Minister Pu F. Rodingliana te chuan Khawzawl District chhunga Dulte Health & Wellness Centre leh Kawlkulh Primary Health Centre te an tlawh a. Directorate of Health Services (DHS) Director Dr. Lily Chhakchhuak leh Khawzawl District Chief Medical Officer (CMO) Dr. Shahnaz M. Zothanzami te an tel a ni.
Minister Pi Lalrinpuii chuan Dulte H&WC hmunhmate enin, thawktute nen an inkawm a. Mipuite tan pan a awlsam zawk nan Sub Centre hlui chu sak thata H&WC atan hman ni se, nau neihna tur delivery point pawh siam ni se tha a tih thu sawiin, tuna H&WC atana hman lai mek chu quarter-ah hman ni se a ti a, hma la turin CMO a chah nghal a. Dulte VC House-ah khawtlang hruaitute nen inkawmna hun tawi an hmang a, hmun laili zawka H&WC siam a ni tur chu lawmawm an tih thu an sawi.
Minister Pi Lalrinpuii chuan Dulte H&WC-ah thla tin nau piang 3 vel an awm thin chu lawmawm a tih thu sawiin, ram leh hnam kan humhalha, hma kan sawn theih nan pian pun lamah ngaihtuahna kan sen a pawimawh thu a sawi bawk. Hemi hnu hian Kawlkulh PHC tlawhin, PHC sak mek chu Power Minister Pu F. Rodingliana nen an endik a. Minister-te hian engineer leh contractor-te chu tha tak leh uluk taka PHC sa turin an chah a ni.
