Traffic sleeveless jacket (vest) hlanna hun hmang
Vawiin khan Mizoram Cooperative Apex Bank Ltd. chuan Aizawl Traffic Police-te hnathawh an ngaihhlutzia lantir nan Apex Bank Head Office Conference Room-ah Traffic Sleeveless Jacket (Vest) 320; Rs 4,48,000/- man hlanna hun an hmang a. He hunah hian Pu Lalnunsanga, Chairman, Apex Bank, Mizoram Cooperative Apex Bank Ltd. aiawhin chuan Pu C. Vanlalvena, SP Traffic hnenah Traffic Sleeveless Jacket hi a hlan a ni.
He hun hi Pu A. Lallungmuana, Chief Executive Officer, Mizoram Cooperative Apex Bank Ltd. chuan a kaihruai a. Mizoramin ‘National Award for Excellence in Traffic Management’ a dawng chu chhuanawm a tih thu sawiin, hei hian Traffic Police-te inpekna leh Mizo mipuiin ‘Civic Sense’ kan neih that zia a tarlang a ni, a ti a. Pu A. Lallungmuana chuan Aizawl Traffic Police-te chu State dangte hriata Mizoram tihming thatu leh tihmel mawitu an nih thu sawiin; an hnathawh chu ropui a tih thu a sawi bawk. Aizawl Traffic Police-ten an hnathawhna hmuna hâk tur Vest Quality tha tak neih an phû tih sawiin vawiina Mizoram Cooperative Apex Bank Ltd. te’n Vest 320 an pe thei chu lawmawm a tih thu a sawi a. Mizoram Cooperative Apex Bank Ltd. chu a tul anga Aizawl Traffic Police-te tan insenso zel an inhuam tih a sawi bawk a ni.
Pu C. Vanlalvena, SP Traffic chuan Aizawl Traffic Police tana Mizoram Cooperative Apex Bank Ltd. inpekna chu lawmawm a tih takzet thu a sawi a. Aizawl Traffic Police-te hnathawhna atan a thil tangkai tak leh Traffic Discipline vawnna kawngah pawh hmanraw tangkai tak a nih tur thu a sawi. SP Traffic chuan kumin January thla atanga June thla chhungin lirthei dan bawhchhia 5,388 zet an awm tawh thu a tarlang a. Traffic dan bawhchhiatna avanga pawisa chawi tlingkhawm pawh Rs. 60,99,300/- a tlin tawh thu he hunah hian tarlangin, lirthei khalhtuten dan zawm an ngaih pawimawhna tura inzirtirna leh fimkhur kawngah he hmalakna hian nasa takin a puih a beisei thu a sawi bawk a ni.
