Larsap-in Green Mizoram Day pualin thing tiak a phun
Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Green Mizoram Day 2026 thingphun hnatlangpui hma hruaiin tukin khan Upper Lawn, Lok Bhavan-ah Mizoram State Tree ‘Herhse’ tiak a phun. Larsap hnung zui hian Governor’s Secretariat-a thawktu ten thing tiak an phun a ni.
Larsap General (Dr) Vijay Kumar Singh chuan Green Mizoram Day puala thingphun runpui kum tina neih thin chu tha a tih thu sawiin, hemi ni chauh ni lo, thingphun hun chhunga thing tiak tam thei ang ber phun turin mipuite a chah a. Hmun dang ngaihtuahin Mizoramin hmun hring leh thing leh mau a nei tha rih tih sawiin, hengte hi Mizoram sik leh sa tinuama, boruak tithianghlima, ruahtui tlak dan thlenga danglamna thlentu an ni a, sik leh sa inthlak danglam zel tur ven nan kan humhalh a tul a ni, a ti a. Mizoram puma Green Mizoram Day hmangtute chu thing tiak phunah tawpsan mai lova, a puitlin ngei theih nan a enkawl zui zel kawngah theihtawp chhuah chhunzawm turin a chah a ni.
Tukin Lok Bhavan-a Green Mizoram Day puala hun hmanah hian Pu Vinod P. Kavle, Commissioner & Secretary to Governor, Pu Lalnunsanga Khawlhring, Divisional Forest Officer, Aizawl Forest Division, Pu K. Laltlawmlova, Joint Secretary to Governor bakah Governor’s Secretariat leh Environment, Forests & Climate Change Department hnuaia thawktute an tel a ni.
