LMC Vice Chairman Pu K. Lalrinawma’n Mizo Upa Pawl Chanmari Unit Golden Jubilee lawmna hun a hmanpui
Vawiin khan Mizo Upa Pawl (MUP) Chanmari Unit, Lunglei chuan MUP Office, YMA Chanmari Hall-ah an kum sawmnga tlin, Golden Jubilee lawmna hun an hmang a. Lunglei Municipal Council (LMC) Vice Chairman Pu K. Lalrinawma chuan Khuallian niin a hmanpui.
Pu K. Lalrinawma chuan MUP Chanmari Unit te’n Golden Jubilee an thleng chu a lawmpui thu sawiin, MUP chu kum upate tana pawl hmingthang leh thil ti thei ber a nih thu leh kum upate hamṭhatna leh dikna chanvo humhalh a, an tawn hriat finnate hlut thiam leh chhawm nun zel chu a thil tum a nih thu a sawi a. MUP chu thil hlu leh thil vang dah khawmna, ‘Museum’ ang an nih thu leh ṭhalai la naupang zawkte’n an neih ve loh thil hlu tam tak MUP member-te chuan an neih thu sawiin, upate chu zir thiamna hmang ringawta thiam theih loh, tawn hriat finna ngai thil hrang hrang – Mizo ṭawng humhalh leh zirtir chungchangah te, hnam ziarang leh nunphung vawn nun kawngah te, ṭhangtharte’n upa zah dan inzirtir kawngah te leh Mizo tlawmngaihna inzirtir kawngah te an pawimawh thu a sawi a. Environment humhalh kawngah leh faina kawngah pawh ṭhalaite cho chhuaktu, fin chhuahtu leh cho phurtu an nih ṭhin thu sawiin, upate tawn hriat chu chhungkuaah leh khawtlangah a hluin, vawn nun zel a ṭul thu a sawi.
Khuallian hian Jubilee puala thilpek atan Golden Jubilee lawmnaa kal kum 85 chinte chu sihdet (torch light) ṭha tak pein, MUP Chanmari Unit tan Carrom Board ṭha tak a pe bawk.
MUP Chanmari Unit Golden Jubilee lawmna hun hi Vice President Pu Lalthangluia Sailo chuan kaihruaiin, BCM Chanmari Bialtu Pastor Rev. V. Lalzarliana’n hunserh a hmang a. Chanmari Local Council Chairman Pu C. Ralliana chuan Souvenir tlangzarhin, LC Vice Chairman Pu Raymond Zonunsanga chuan Chanmari Local Council ai awhin Jubilee lawmpuina thuziak leh pawisa fai a hlan bawk.
MUP Chanmari Unit Golden Jubilee lawmna hun hi nilenga hlung taka hman niin, tlai lamah Jubilee lawmna ruai ṭheh a ni.
