Health Minister Pi Lalrinpuii’n Lungleia MIZOFED building sak thar a hawng

Vawiin khan Mizoram sawrkara Health & Family Welfare Minister Pi Lalrinpuii chuan Lunglei Electric Venga MIZOFED (Mizoram State Cooperative Marketing & Consumers’ Federation Limited) building sak thar a hawng.

Khuallian Pi Lalrinpuii chuan MIZOFED building thar hawn a ni ta chu Lunglei mipuite tan hmasawnna ropui tak a nih thu sawiin, Mizote chu thil tih ho nuam ti chi, feh kawng, tui chawina leh thing phurhna thlenga ṭhiante nena inlawma thil ti ṭhin kan nih angin kan mizia leh co-operative society chu inhmeh hlea a hriat thu a sawi a. Cooperative Society chuan Mizoramah zung a kaih thuk hle tih sawiin, khaw tin veng tin deuhthawah society dawr din a nih thu leh tun thleng pawhin thingtlang khaw tam takah mipuite tana dawr hlawhtling tak a la nih reng thu a sawi a. Mizoramah kum 1981 aṭanga State pum huap Cooperative Society hlawhtling tak mai MIZOFED din a ni a, tun thlenga hlawhtling taka kalpui a ni chu lawmawm a tih thu sawiin, mipui mimir chuan MIZOFED chu a man tlawma thil zawrhna leh a hlawma thil lak tlawm theihna tia an hriat ṭhin a nih thu te, MIZOFED-ah chuan thil lem leh quality ṭha lo zawrh a nih ngai loh thu te a sawi a. Chu hmingṭhatna chu vawng nung reng turin thawktute pawh a chah nghal.

Pi Lalrinpuii chuan MIZOFED chu State pum huap Cooperative Society a nih avangin sawrkar pawhin a theih ang anga a lo duhsak ṭhin thu leh thawktute nen pawh inpawh tlang tak leh ṭhahnem ngai taka an thawh ho ṭhin thu sawiin, sawrkar nen thawh hona ṭha tak chu chhawm nung zel a, ram hmasawn nan theih tawpa ṭan la zel turin a chah a. MIZOFED Office Building thar pawh chu mipuite leh society tana ṭangkai taka hman a nih a, mi tam tak tana malsawmna a nih chho zel a beisei thu sawiin, duhsakna a hlan.