IPR, P&S Minister-in USA atanga Mizo lehkhabu ziak hmasa ber a tlangzarh
Vawiin khan IPR, P&S Department changtu Minister Pu B. Lalchhanzova chuan a Pisa ah, Indiana , USA-a cheng mek Pu Zo Sanga lehkhabu ziah, ‘Genre Hran (Nihphung Danglam)’ tih chu a tlangzarh.
Tlangzarh puala hun hmanah hian IPR, P&S Department changtu Minister Pu B. Lalchhanzova chuan lehkhabu danglam tak mai tlangzarh tura sawm a ni chu lawmawm a tih thu sawiin, ram pawna awm Mizo ten Mizoram leh an Mizo puite rawn ngaipawimawha kawng hrang hranga inzawmna an rawn siam thin chu hlu a tih thu a sawi a. America ram atanga Mizo lehkhabu mimal ziah hmasa ber tlangzarhtua a tang chu a ngaihhlut thu sawiin, Genre hran (Nihpung danglam) chu a hming ang ngeiin a danglamin Mizo mipuite tan hlawkna tam tak lehkhabuah chuan chhar tur a awm a rin tlat thu a sawi a ni.
Tlangzarh puala hun hman hi Prof RL Thanmawia, MAL Khaipa chuan kaihruaiin, Dr H. Laldinmawia’n Lehkhabu thlirlawkna a nei a. Thlirlawktu Dr. H. Laldinmawia chuan, “Genre Hran ah hian phek 309 awmin bung 91 zet a awm a, bung tin hi chhiar nuam tawka tawi leh fel a nih bakah mi tin mil a ni” a ti a ni.
Vawiina tlangzarh tak Lehkhabu ziaktu Pu Zo Sanga hi kum 2000 vela USA a chhuk thla a ni a. Tunah hian US Potal Service, Pennsylvania State University ah a thawk mek a ni.
