Health Minister Pi Lalrinpuii’n Siaha tlawh

8 hours ago Sonakshi Sarkar

Health & Family Welfare Minister Pi Lalrinpuii chuan vawiin tlai khan Siaha thlengin Tourist Lodge-ah District Bawrhsap Pu VL Hruaizela Khiangte hovin Sawrkar hotute, Tlawmngai pawl aiawhte leh Party aiawhten lo dawngsawngin reception hall-ah inkawmhona hun tawi an hmang.

Pi Lalrinpuii chuan kalkhawmte chu chibai a buk a, sawrkar department hrang hrang thawhhona chu fakawm a tih thu sawiin hun lo la kal zel turah pawh district hmasawnna turin theihtawp chhuah tlang turin a chah.

Siaha-a health lama thawktute hnathawh chu chhuanawm a tih thu sawiin malaria leh scrub typhus laka beihpui an thlakna kawngah an chhuanawm takzet a ti a, Tlawmngai pawl hrang hrang bakah kohhran ten sawrkar hmalakna an tawiawm that thu a sawi bawk a ni.

Ruahman lawk dan ang chuan Health Minister Pi Lalrinpuii chuan Naktuk hian Siaha a Nursing school sak mek bakah Maraland Gospel Centenary Hospital a tlawh ang a, District Hospital a CT Scan khawl thar leh RtPCR laboratory thar a hawng nghal dawn a ni.