EF&CC Minister-in 25th Batch Forester leh 33rd Batch Forest Guard Convocation a hmanpui
Vawiin chawhnu khan Pu Lalthansanga, Environment, Forests & Climate Change (EF&CC) Minister chuan Bethlehem Vengthlanga Forest Training School-ah Forester batch 25-na leh Forest Guard batch 33-na te Convocation chu Khuallian niin a hmanpui.
Minister chuan Forester leh Forest Guard Training zo hlimte chu a lawmpui thu a sawi a. Forest Department hmel lanna tur, mipui nena inhne hnai turte an nih avangin dik tak leh rinawm taka an hna thawk tura chahin, anmahni leh Department hmel mawina vawng nung tura inuluk turin a fuih bawk.
Khawvel thang zelah Ramngaw leh nungchate hlutna a lang chiang deuh deuh zel a, Mizoramah pawh kan ramngaw leh nungchate kan humhalh that lehzual a tul a. Chak zawka hma kan lak theihnan Forest Department thuam chak zel Mizoram sawrkarin a tum a ni, a ti a. Forester leh Forest Guard tharte chu duhsakna a hlan bawk.
