Chief minister-in tlangnuam khawtlangin aiff futsal champion an nih an lawmna a telpui
Vawiin khan Tlangnuam khawtlang chuan All India Football Federation Futsal Championship 2025-26 champion an nih lawmna Tlangnuam Veng Community Hall-ah an buatsaih a, Chief Minister Pu Lalduhoma chuan khuallian niin a hmanpui a, Pu Lalchhuanthanga, bialtu MLA chu khualzahawm niin bialtu Corporator Dr. Lalmalsawma Nghaka chu Khualtha a ni.
Chief Minister chuan Tlangnuam Futsal Club te a lawmpui a, vawi khat Champion-ah hian in duh tawk mai ang tih ka hlau a. Asia khawmualpui huapa inelna AFC Asian Futsal Cup a la awm a, chu mi chungah chuan khawvel huapa FIFA hnuaia inelna Futsal World Cup te a la awm zel a. Heng inelna sang zawk hi in thlir phak tur a ni.
India Team-a tel phakahte kan lawm tawk ringawt tur a ni lo. India National Team innghahna, India National Team-te Futsal World Cup thlenpuitu, Champion-pui thei Player nih kan tum zawk tur a ni. Chu rilru chu MFA hian pu tlat se, kan Futsal Players-te pawhin lo tum tlat ang che u, a ti a. Tlangnuam Futsal Club hi lawmpuina pawisa fai a pe a ni.
Mizorama Futsal-in chak taka hma a sawnna kawngah MFA hmalakna a fak a, infiamna huang hrang hrangah kan thalaiten theihna sang tak an nei tih kan hriat avangin sorkar pawh kan phur a. Bana Kaih hmanga hma kan lakna hmasaber pawh infiamna lamah a ni. Football bikah phei chuan infrastructure thar leh kan neihsate thuam thatna kan kalpui nasa a. Hmathlir fel tak neiin ke kan pen mek a ni, a ti.
Khualzahawm Pu Lalchhuanthanga, Bialtu MLA pawhin thu a sawi bawk.
Pu Lalrinzama, Tlangnuam Futsal Club Manager chuan report a pe a. An club hi kum 2020 a din a ni a, Managing Board an nei a, an thiltum ber chu an veng thalaite infiamna lama tihhmasawn leh Mizoram hming titha tura theihtawp chhuah a ni. Khawtlanga mi tlawmngaiten an tanpui thin a, veng chhung mipuiten an thlawp tha thin hle.
AIFF Champion khel tur hian mahni state league-a champion nih a ngai a. MFA Futsal Champion an nih anga tun tuma India huap inelna hi zu khel thei an ni. Inelna hi Gujarat-ah khelh a ni. Tlangnuam Futsal Club hian an khelh chhungin chak loh an nei lo va, an tumpuite lamah goal 69 an khung a, an lamah hian goal 12 a lut thung. An keeper-te pahnih tih loh player dang zawngten goal an khung vek a ni.
Champion lawmna inkhawm hi Caroline Lalrosangin a kaihruai a, Pu K. Lalenglianan hunserh a hmang a, Pu R. Lalrinawma, Organising Chairman chuan kalkhawmte lawmna thu a sawi a, Pu Abraham Lalthakima, National Powerlift Gold Medalist hnenah chawimawina an hlan.
