Excise Minister Pu Lalnghinglova Hmar hovin Mizorama khuh damdawi hluar chungchang ngaihtuah
Vawiin khan Pu Lalnghinglova Hmar, Minister of State, Excise & Narcotics Departments hovin MINECO-a a office chamber-ah Excise & Narcotics Department, Home Department, Food & Drugs Administration (FDA) leh Central YMA aiawhten Ruihhlo Do Meeting an nei a, tunhnaia thalai zinga khuh damdawi hluar chho zela hmalak dan tur an ngaihtuah. Pu Lalnghinglova Hmar chuan tunhnaiah a bikin thalai lamah khuh damdawi ruih a hluar chu thil ngaihmawhawm tak a nih thu a sawi a. Khuh damdawi hi naupang zawkten zu leh damdawi dang an khawihna kailawn langsar tak a ni, tiin, ruihhlo dang leh damdawi hlauhawm tak tak kan vei rualin, khuh damdawi zalen lutuk hi engtinnge kan tihreh theih ang tih hi kan ngaihtuah a ngai a ni, a ti. Khawvel hmun dangah pawh uluk taka khuahkhirhna kalpui a ni a, Mizoramah a zalen em em mai chu thil nih dan tur a ni lo tiin a sawi.
He meeting-ah hian report hrang hrang ngaihthlak niin tunhnaiah a bikin thalai zingah khuh damdawi ruih a zual thu ngaihthlak a ni a. Zirlai naupang atanga sakhaw rawngbawltu thlenga a nghawng avangin hmalak dan tur ngaihtuah a tul hle tih sawi a ni. Tun dinhmuna khuh damdawi hluar dan leh chu miin harsatna a thlen te, hma la tura dan tlawhchhan theihte zirchianna mumal tak neih ni se tih a ni a. Harsatna hrang hrang ching fel tura hmalak dan tur te buatsaih a, mapping mumal tak lo ti turin Home Department, Excise & Narcotics Department, FDA leh Central YMA aiawh pakhat theuh ruat an ni a. An zirchiannate chu meeting leh hunah thlirho a, hmalak chhunzawm dan ngaihtuah tur a ni ang.
Central YMA in damdawi zuarte hnenah prescription tel lova khuh damdawi hralh lo turin ngenna siam ni se, tiin meeting chuan a rel bawk a. Branch tin huamchhunga damdawi dawrte in report turin ngen ni se, tih a ni bawk. Hmalak chhunzawm dan ngaihtuah turin a ranglama meeting leh ni se, meeting leh hunah hian Social Welfare & Tribal Affairs bakah Mizoram Chemist and Druggist Association te sawm ve ni se, tiin meeting-ah hian an rel a ni.
