FCS&CA Department-in Union Minister of State Pi Nimuben Jayantibhai Bambhaniya pualin Inkawmhona leh Zanriah kilhona hun an nei
Nizan khan Food, Civil Supplies & Consumer Affairs (FCS&CA) Department, Government of Mizoram chuan Mizoram tlawha lo zin mek Union Minister of State(MoS) for Consumer Affairs, Food & Public Distribution(CAF&PD) Pi Nimuben Jayantibhai Bambhaniya pualin Aijal Club-a R.B. McCabe Hall-ah Inkawmhona leh Zanriah kilhona hun(Interaction-cum-Dinner Programme) a buatsaih a. He hunah hian FCS&CA Minister Pu B. Lalchhanzova; FCS&CA Secretary Pu Ravi Dadhich, IAS; PS to MoS Pi Jagriti Rohit Singla, IRTS; Addl PS to MoS Pi Khushbu Suthar, GAS; Food Corporation of India (FCI) General Manager (NEF Region) Pu Sandeep Deora te bakah FCI leh state official dangte an tel a ni.
Minister of State Pi Nimuben Jayantibhai Bambhaniya chuan Mizoram a lo kal thei hi a lawm thu sawiin, Mizoram chuan GI tag nei tawh Mizo Sawhthing leh Mizo Hmarcha te mai bakah khawvel hriat khawpa hmingthang Cheraw lam ang hian thil danglam leh tualchhuak thil engemaw zat a neih thu a sawi a; amaherawhchu, Pi Nimuben chuan Mizoram a tlawh chhan chu a mawina leh hlawhtlinnate thlir ringawt tur ni loin state-in harsatna a neihte zira, a tul anga chingfel tura a lo kal thu a sawi a ni.
Pi Nimuben chuan Prime Minister Narendra Modi hruaina hnuaiah hian mi vaibelchhia 81 (81 crore)-in a thlawnin ration an dawng reng a, hei hi Europe rama mihring awm zat aia tam a nih bakah khawvel puma ei leh bar khamkhawp inngaihtuahsakna (food security program) lian ber a ni, a ti. Hei hi PM-in ‘Mi zawng zawng tan Chaw’ (Food for All) a ngaih pawimawh vang a nih thu sawiin, MoS chuan Mizoramah pawh mi tinin eikhawp hnianghnar an neih reng theih nan theihtawp an chhuah dawn tih a tiam a ni. MoS chuan FCS&CA Department hmalakna leh hlawhtlinnate fakin, e-KYC, EPOS leh SMART PDS te hian mi tam tak a tanpui a ni, a ti a. Hemi bakah hian MoS chuan hmarchhak bialah fur ruahtui tlak nasat avanga inkalpawhna kawngpui a chhiat fo thin thu sawiin hmarchhak state-te hnenah fur thlen hmain thla 3 daih ration pek lawk an nih theih nan tanpui a inhuam thu a sawi bawk a. Chutih rualin, Mizoram harsatnate CAF&PD Minister Pu Pralhad Joshi hnen thlenpui a, inkawmna hun siamsak a inhuam thu a sawi bawk a ni.
He hunah hian Minister Pu B. Lalchhanzova pawhin thu sawiin Mizoram tlawh a, state harsatna hrang hrangte a hmun ngeia a rawn zirchian avangin MoS Pi Nimuben hnenah lawmthu a sawi a. Mizoram eikhawp (food supply) a awm reng theih nana an tanpuina avangin Sorkar laipui leh FCI-te hnenah lawmthu a sawi bawk. Minister chuan Mizoram pawhin sorkar laipui nena thawhdunna tha tak neih zawm zelin, mi tinte chanvo tur chu a bothlau a awm lohnan tan nasa leh zuala an lak tur thu a sawi a. Mizorama food supply tihhmasawn zel nan leh ‘Mi zawng zawng tan Chaw khawpkham (Food for All)’ a thlen ngei theih nan Mizoram NFSA quota tihpun sak turin MoS chu a ngen bawk a ni.
FCS&CA Secretary Pu Ravi Dadhich pawhin Mizoram dinhmun dik tak a hmun ngeia a rawn thlir pui avangin MoS hnenah lawmthu a sawi a. PowerPoint presentation hmangin an department dinhmun leh hmalakna te tarlangin, state sawrkar kalpui mek- Non-NFSA(Card var) leh MSSRP(Card Sen) programme-te a hrilhfiah bawk a ni.
Nizan hun hmannaah hian FCI General Manager (NEF Region) Pu Sandeep Deora pawhin PowerPoint Presentation hmangin Mizoram tana food supply leh warehousing kawnga an hmalakna hrang hrang te, tun thlenga an dinhmun te, harsatna an tawh mekte leh chung harsatna sutkian nana hmalakna turte a tarlang bawk a ni.
Nizan programme hi FCS&CA Department Director Pi Saizikpuiin kaihruaiin, kalkhawmte lawmna thu a sawi a; lawmthu sawiin programme hi a khar bawk a ni. Hemi hnuah hian kalkhawmte pualin zanriah kilhona leh inkawmhona hun buatsaih zui a ni.
