Adviser to CM (Technical) Er. H. Ginzalala’n Lailiphai leilung zirchianna mithiamte nen a nei
Adviser to CM (Technical) leh Champhai North bialtu MLA ni bawk Er. H Ginzalala leh Senior Scientist ICAR-IGFRI, Jhansi mithiam rual ten Champhai a Ran chaw chinna hmun leh Lailiphai leilung te an zirchiang
A Bial chhung hmun hrang hrang tlawh a cham mek MLA Er. H Ginzalala leh a team te chuan Champhai a Ran chaw tur chinna hmun te leh Lailiphai, Hnahlan leilung te chu a hmunah kalin an zirchiang a, he hun hmang tur hian mithiam rual Dr. Arun Kumar Shukla, Principal Scientist & Head, GSM Division, Dr. Purushotam Sharma, PS and Head, Plant Animal Relationship Division leh Dr. Amit Kumar Singh, Scientist te chu chah chhuah an ni.
Vawiin khan Champhai Zote a K Laldawngliana Fodder plantation chu an tlawh a. Ran chaw tur atan bik a chin Nappier grass te chu a hmunah Scientist rual te nen en ho in, hlawk zawk leh ṭha zawk a tharchhuah a nih theih dan tur te, mi tam zawkin an hman ṭangkai dan tur bakah, a enkawl dan turte an ngaihtuah ho a, Plantation enkawltu te hnenah ṭangkai tur zirtirna te an pe a ni.
Vawiin vek khan MLA Team te hian Hnahlan Lailiphai chu tlawhin Agriculture link road siak mek an endik nghal a. Hemi hnu hian mi thiam bik Senior Scientist rual te chuan Lailiphai leilung te chu a theih ang ang a zirchiangin, Leilung mila thlai chin tur te, Ranchaw hlawk zawka tharchhuah dan tur te, Leilung mila thlai chin enkawl dan tur thlengin an zirchiang a. Lo neitu te hnenah a theih ang anga zirtirna pe nghalin heng leilung a an chin thil engpawh enkawl chhunzawm dan tur zirtirna an pe nghal a ni.
Hnahlan Lailiphaiah hian Thlasik thei, Mizorama kan chin ngai loh, Vur pawh ngam Thei te chi hrang hrang chinga enchhinna neih a ni dawn a, heng hmaklakna te hian Lo neitu te chu a ti phur hle a ni. Hemi hnu hian Horticulture plantation chu a hmunah kalin an enfiah bawk a ni.
MLA Er. H. Ginzalala hi Senior Scientist rual bakah hian Pu Malsawmtharzela, JE Agriculture & FWD; Department mi leh sa te leh lo neitute chuan an ṭawiawm a ni.
