AIR Lunglei chuan All India Radio kum 90 tlin lawmna pualin Lamp Lighting hun an hmang

All India Radio kum 90 tlin lawmna pualin AIR Lunglei chuan nimin khan Lamp Lighting Ceremony a buatsaih a, AIR Director leh Mizoram Cluster Head Pu DR Lalropuia chuan AIR kum 90 puala chhit det chu a hawng a ni.

Nimina hun hmanah hian Director Pu DR Lalropuia chuan All India Radio chu India in ram zalen anih hma June ni 8, kum 1936 ah din ani a ti a, India zalenna hmuh hmaa mipuite awi tleitu ber alo ni tawh a ti a, thuthar puanchhuahna ringawt nilovin India hmasawnna tura thawktu sawrkar leh mipuite thlunzawmtu ṭangkai tak ani a ti a, tun thlengin mipuite rin ber ani tih sawiin India in Viksit Bharat 2047 hmalaka hnuaia ram hmasawn nih a tumna ah pawh Radio chuan mawhphurhna pawimawh tak a nei tih a sawi a ni.

Pu DR Lalropuia chuan AIR Aizawl leh AIR Lunglei chu hmarchhak station zinga ṭha pawl ani tih sawiin tunlai thiamna E-Office hmang hmasa zinga mi ani a ti a, ram pumah a ṭha pawl ni thei turah ṭan lak zel a ṭul thu sawiin thawktute theihtawp chhuah turin a chah a, Mipui thinlungah a hlutna a la ngai reng tih sawiin tunlai khawvel hmasawn zelah Radio chuan thil thar hrang hrang a buatsaih tih a sawi bawk.

AIR Lunglei-a Head of Programme Pu Lawmliana Tochhong chuan AIR Lunglei hnathawh hrang hrang sawiin Lunglei mipuite tan AIR chuan ṭangkai takin hna a thawk ṭhin a ti a, Lunglei District Tennis Association President Pu K. Lalawmpuia chuan Radio chu thudik leh rintlak puangchhuaktu an ni tih sawiin mipuiten an rin ber ani tih a sawi.

All India Radio Aizawl hian kum 90 tlin lawmna pual hian state chhungah lawmna hrang hrang a buatsaih a, tukin khan Aizawl, Lunglei leh Siaha ah Walkathon buatsaih niin a lawmna pui ber June ni 8 ah Chief Minister Pu Lalduhoma hovin Vanapa Hall ah hman a ni dawn a ni.