Thla thum chhung kalpui tur jan suraksha campaign hawnna siaha-ah neih a ni
Vawiin khan Ministry of Finance, Department of Financial Services hnuaia thla thum chhung kalpui tur ‘Jan Suraksha Campaign’ hawnna chu DC Mini Conference Hall Siaha-ah neih a ni a, Pu Abraham Beirazi Khithie, Additional DC Siaha chuan saturation campaign hi a hawng. Pu Abraham Beirazi Khithie chuan DLCC memberte kokim taka an kal thei chu lawmthu sawi hmasain Siaha district chhunga khaw awm zawng zawng 99 (sawmkua pakua) chu ‘Jan Suraksha Campaign’ ah hian hmaih nei lova tlawh vek tur a ni a, mipui te’n hlawk taka an chhawr ṭangkai theihna turin bank hotute chu ngaihtuahna seng turin a ngen.
Pu Joseph M Soren, Manager, Lead Bank Office, Siaha leh Lawngtlai District chuan ‘Jan Suraksha Campaign’ kalpui dan tur leh bank te’n khaw hrang hrang an tlawh huna report an thehluhna tur form siamsa sawifiahna a neih bakah kar 4 (li) danah review meeting a awmziah tur thu a tarlang. Lead bank manager chuan bank leh lead bank in thawhhona ṭha tak an neih a pawimawh thu sawi bawkin puih an ngaihna a awm anih chuan an inhawn reng thu member kalkhawm hmaah a sawi. He Saturation Campaign hian July ni 1, 2025 aṭanga September ni 30, 2025 thleng a awh ang.
‘Jan Suraksha Campaign’ hian ram mipuite sum leh paia inbumna awm thei hrang hrang laka an him theihna tur leh sawrkar laipui scheme hrang hrang – Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Pradhan Mantri Jan Dhan Yojna (PMJDY), Atal Pension Yojana (APY) chiang zawka an lo hriat a, hlawkna an lo tel theihna tura hrilhhriat bakah Know Your Customer atana bank-a lehkha pawimawh thehluh tur hrang hrangte anmahni kawtkaiah ngei tihsak an nih theih hi a tum a ni. Vawiin hun hmannaah hian District Level Consultative Committee (DLCC) Member, DDK leh CSC aiawh an tel a. Pu Joseph M Soren, Manager, Lead Bank Office, Siaha leh Lawngtlai District chuan lawmthu sawina neiin hun a khar.
