Union minister shri manohar lal hovin ud&pa leh p&e department hmalakna thlir ho a ni
Vawiin khan MINECO Conference hall-ah Ministry of Power leh Ministry of Housing and Urban Affairs changtu Union Minister Shri Manohar Lal kaihhruaiin State Review Meeting of Power and Housing & Urban Affairs, Mizoram neih a ni. He meeting-ah hian UD&PA Minister Pu K.Sapdanga leh P&E Minister Pu F.Rodinglianate’n an telpui a. Urban Development & Poverty Alleviation Department leh Power & Electricity Department-a thawktute he hunah hian an tel bawk a ni.
Union Minister Shri Manohar Lal chuan kawphetha hman man khawn chungchanga harsatna awmte chu zirchianga, hman man kim taka khawn chhuah a nih theih nan a tul anga hma la turin Power & Electricity Department-a thawktute chu a chah a. Smart Meter vuah kawngah Sawrkar building leh sumdawnna hmun lian atanga kalpui tan a pawimawh thu leh, kawphetha hman man tha taka khawn chhuah a nih theih nan Pre-paid kalpuinaah ‘Security deposit’ kalpui tel a pawimawh thu a sawi. Union Minister chuan kawphetha chu ram hmasawnna tura hmanraw pawimawh tak a nih angin kawphetha renchem thiam leh siam chhuahna kawngah ruahmanna tha neih a tul thu a tarlang a. Nizung hmanga kawphetha siam chhuah chu uar deuh deuh turin Power & Electricity Department-a hotute chu a chah a. Mizoram lui pathum, Tlawng, Tuivai leh Chhimtuipuia Hydro Electric Power plant siam tura ruahmanna kalpui dan tur pawh, P&E Minister Pu F.Rodingliana nen Delhi-ah sawi zui pui a tum thu a tarlang bawk a ni.
Shri Manohar Lal chuan UP&PA leh P&E Department thawktute a kawm zawh hian thutharthehdarhtute a kawm a. Swacch Bharat Mission (SBM) kum 10 kalpui a nih tawh thu leh chumi chhung chuan Mizoram chuan Open Defecation Free mai piah lamah ODF + dinhmun a luah mek thu tarlangin, bawlhhlawh sawngbawl kawnga sawt zawka hmalakna kalpui dan turte sawiho a nih thu a sawi a. Khawpui vawn fai, bawlhhlawh thliar hran leh faina leh thianghlimna kawnga hmasawnna a thlen zel theih nan Sawrkar laipui atangin puih an inhuam reng thu a sawi a ni.
Vawiin thutkhawm ah hian Mizoram kawlphetha dinhmun sawi ho niin, Mizoram chhunga Smart Metre vuah tawh zat hi bituk zat atangin za zelah 18 zawh fel tawh a ni a . Revamped Distribution Sector Scheme (RDSS) hnuaiah state grid tihchak hna kalpui mek a nih thu tarlan a ni a. Chung hmalaknate chuan Smart Meter vuah tura bituk zat 2,92,081 zinga 52,886 smart meters vuah tawh niin, 18.01% hna thawh zawh a nih thu te, Prepaid meter conversion programme bul tan nan P&E Department office atanga hmalak a nih thu te tarlan a ni a. Standard Operating Procedure (SOP) pawh tihfel tep a ni tawh thu leh hemi hnu hian prepaid hmang hmasa apiang tan 2% rebate pek tel a nih tur thu tarlan a ni.
