Ui khuahkhirh chungchangah Serchhip District sawrkar thuneitute leh khawtlang hruaitute inrawnkhawm

2 months ago Sonakshi Sarkar

Vawiin khan Serchhip District Bawrhsap Pu Paul L. Khuma hovin Serchhipa VC Area hrang hranga Village Council President-te leh YMA Sub Headquarter hruaitute’n khauh zawka Serchhip District-a ui khuahkhirh dan tur chungchang an sawi ho.

Serchhip District Deputy Commissioner chuan ui khuahkhirh tura hriattirna August ni 11 khan a lo tichhuak tawh a, hetih mek lai hian ui khuahkhirh lova chhuak an la awm fo bakah midang tan harsatna an thlen tih hriat a ni a; chuvangin khawng lehzuala hmalak tum niin, Magistrate, Police leh vantlang hruaitute team hrang hrangah insiamin, veng hrang hrangah endikna (Inspection) neih a ni tawh dawn a ni. Ui chhuak hmuh a nih chuan man a nih mai bakah a neitute lakah District Magistrate–in Criminal Complaint a siam thin dawn a ni.

Hetianga khawlai ui khuahkhirh lova chhuah hi BNSS Sec. 163 hmanga khap a nih angin BNS Sec. 223 hmangin ui neitute chu “Kum 1 thleng lung in tan tir emaw, Rs. 5000 thleng chawi tir emaw, a pahnih emaw hmang pawha hrem theih an ni”.