Lehkhabu pho runpui ah lehkhabu hralhchhuak hnem
Mizo Writers’ Association (MWA) in Mizo ziak mite tana a hlawma an lehkhabu ziah pho chhuah sak vawi 6-na Lekhabu Pho Runpui (LPR-6) Aizawl Vanapa Hall-a buatsaihah cheng nuai 16, sing 6, sang 3 leh 780 man lehkhabu hralh chhuah niin, cheng nuai 6, sing 5, sang 2 leh 47-in nikuma an hralh zat an khum.
October Ni 16 atanga tan Lehkhabu Pho Runpui hi Inrinni tlai khan khar a ni a, ni riat chhung hian tlawhtu an tamin mipuiin an hlut hle. LPR-6 a Organising Committee hotute chuan kumin LPR-6 a lekhabu hralh tam chhanah hian media lamah nasa taka tan an lak vang a nih thu te, Mizoram Journalist Association (MJA) leh Youtuber ten an thawhpui that vanga kum dang khuma record siam thei khawpin mipuiin lehkhabu an lei niin an sawi a ni.
MWA hian kum 2019 khan a vawi khat na’n LPR hi buatsaihin hripui lengin a tihbuai hnua kum 2022 atang khan chhunzawm leh a ni a. Kumin hi an buatsaih tum 6-na a ni. Digital khawvela an chen tawh laia lehkhabu la chhiar thin leh chhiar tum mi thahnem tak an la awm tih hriat chu a nuam takzet tih MWA hruaitute chuan an sawi a ni.
